खिमराज चालिसे, भारत ।
दुर्घटनामा ज्यान गुमाएका नेपाली युवाको शव मूल प्रवाह अखिल भारत नेपाली एकता समाजको पहलमा स्वदेश पठाइएको छ ।
चितवनको भरतपुर महानगरपालिका पिप्लेका ३७ वर्षीय सुरेश दराइको उत्तरप्रदेश राज्यको जोनपुर जिल्लाको नई गन्ज मोहल्लामा १० फरवरीमा सडक दुर्घटनामा मृत्यु भएको थियो । दराइको शव मंगलबार मूल प्रवाहको पहलमा स्वदेश पठाइएको हो ।
जोनपुर जिल्लाको नईगन्ज मोहल्लामास्थित एक फास्टफुडमा कार्यरत सुरेशलाई १० फरवरी राति १० बजे अज्ञात वाहनले हानेपछि उनको घटना स्थलमै मृत्यु भएको थियो ।
घटनाबारे मूल प्रवाहका केन्द्रीय सदस्य राम प्रसाद पौड्याल (हैदराबाद) मार्फत मूल प्रवाहको केन्द्रीय कार्यालयमा जानकारी आएपछि तत्काल केन्द्रीय सल्लाहकार लक्ष्मी प्रसाद ज्ञावलीलाई घटनास्थल पठाइएको थियो। उहाँ घटना स्थल पुग्दा शवलाई प्रहरीले लगिसेकेको थियो ।
त्यसपछि मूल प्रवाहले आफन्तको खोजतलास गरेको थियो । नेपालबाट मृतकका आफन्त बुद्धिबहादुर दराइ, जितेन्द्र दराइ, आइतराम दराइ र भरत माझी आएपछि शव प्रशासन मार्फत परिवारलाई बुझाएको थियो । परिवारको इच्छानुसार मूल प्रवाहले शव नेपाल पठाएको हो ।
