काठमाडौं । राष्ट्रिय जनमोर्चाका अध्यक्ष चित्रबहादुर नेपालमा अमेरिकी साम्राज्यवाद प्रत्यक्ष रुपमा पसेको बताउनुभएको छ ।
मंगलबार एक रेडियोलाई अन्तर्वार्ता दिँदै अध्यक्ष केसीले भारतीय चलखेल बढिरहेको अवस्थामा अहिले अमेरिकासमेत नेपालमा प्रत्यक्ष रुपमा छिरेको दाबी गर्नुभयो ।
उहाँले रवि लामिछानेको पार्टी अमेरिकाबाट सञ्चालित भएको दाबी गर्दै उनलाई गृहमन्त्री बनाउन केपी ओली विदेशीको इशारामा नाचिरहेको आरोप पनि लगाउनुभयो ।
‘भारतीय चलखेल त बढेकै छ । चाइनासँगको प्रतिस्पर्धाका कारण अमेरिका डाइरेक्ट प्रवेश गरेको छ । पार्टी खोलेरै चलखेल गरिरहेको छ’ केसीले भन्नुभयो, ‘सबैले रवि लामिछानेलाई गाली गर्छन्, उसलाई कसले खेलाएको छ ? शक्तिराष्ट्रको दब्बु भएपछि देशको स्वाभिमान बच्छ ?’
केसीले थप्नुभयो, ‘खड्ग्रप्रसाद ओलीले दुईतिरको नागरिकता र राहदानी भएको व्यक्तिलाई गृहमन्त्री बनाए, अझै पनि बनाइरहन चाहेका छन् । यो नांगो नाच हो ।’
शक्तिराष्ट्रहरुको चलखेलका कारण नेपाल युक्रेन बन्ने खतरा बढिरहेको केसीको भनाई छ ।
‘नेपालको भविष्य अत्यन्त अप्ठ्यारो छ । कतै युक्रेन त बन्ने होइन ?’ उहाँले भन्नुभयो ।
केसीले अहिले विभिन्न राजनीतिक दलहरु आफ्ना लागि कम्फर्टेबल राष्ट्रपतिको खोजीमा दौडिरहेको पनि बताउनुभयो । राष्ट्रपति कुनै दल वा शक्तिको खेलौना बन्न नहुने भन्दै उहाँले राष्ट्रपति संविधानको पालक हुनुपर्नेमा जोड दिनुभयो । उहाँले अहिले नै को राष्ट्रपति बन्छ भन्न नसकिने पनि बताउनुभयो ।
‘दलहरुको अहिलेको दौडधुप कम्फरटेबल राष्ट्रपतिका लागि हो । तर राष्ट्रपति संविधानको पालक र रक्षक हो । ऊ कुनै दल वा शक्तिको खेलौना हुनुहुन्न’ केसीले भन्नुभयो, ‘कसैका निम्ति गलत काम गरिदिने, कसैका पक्षमा ढलमल गर्नेले जागिर खालान्, सेवा सुविधा लेलान् । तर इतिहास रच्न सक्दैनन् ।’
