काठमाडौं । वरिष्ठ पत्रकार दुर्गानाथ शर्माको निधनप्रति नेपाल पत्रकार महासंघले दुःख प्रकट गरेको छ ।
शर्माको उपचारका क्रममा बुधबार मनमोहन कार्डियोथेरासिक भस्कुलर एण्ड ट्रान्सप्लान्ट सेन्टर, शिक्षण अस्पतालमा निधन भएको हो। मुटुसम्बन्धी रोगबाट ग्रसित ७२ वर्षीय शर्मालाई पछिल्लो समय रक्तचाप र पिसावमा समेत समस्या देखिएपछि ५ दिनअगाडि उपचारका लागि शहीद गंगालाल ह्दयरोग केन्द्रमा भर्ना गरिएकोमा हिजो मंगलबार उक्त अस्पतालमा ल्याइएको थियो । स्वर्गीय शर्माका श्रीमती र दुई छोरा हुनुहुन्छ ।
विस २००४ साल जेठ १४ गते इलाममा जन्मनु भएका शर्माले गोरखापत्र दैनिकको सम्वाददातको रुपमा पत्रकारिता सुरु गुर्न भएको थियो । शर्माले रेडियो नेपाल हुँदै नेपाल टेलिभिजनमा स्थापनाकालदेखि नै आवद्ध रही महाप्रबन्धकको जिम्मेवारी वहन गर्दै ९ वर्षअगाडि टेलिभिजनबाट अवकास लिनु भएको थियो । तत्पश्चात एभिन्यूज टेलिभिजन, माउन्टेन टेलिभिजनलगायतमा आवद्ध रहेर काम गर्नुभएका शर्माले पछिल्लो समय साहित्य क्षेत्रमा समेत कलम चलाउनु भएको थियो ।
उहाँद्वारा लिखित ‘बिनाराहदानीको विदेश यात्रा’, ‘छाल’ लगायतका पुस्तक प्रकाशित भएका छन् । नेपालको टेलिभिजन पत्रकारिता क्षेत्रमा उल्लेख्य योगदान पु-याउनु भएका शर्माको निधनले नेपाली पत्रकारिता जगतले एक जना कुशल, अनुभवी, निर्भीक र व्यावसायिक पत्रकारलाई गुमाएको महासंघले जनाएको छ ।
नेपाल पत्रकार महासंघले स्वर्गीय शर्माप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनमा धैर्यधारणाको कामनासहित गहिरो समवेदना प्रकट गरेको छ ।
