शङ्करप्रसाद पोख्रेल, बुटवल ।
कम्युनिस्ट सङ्ग्रहालय नेपालको तेस्रो साधारण सभा नेकपा (मसाल) का महामन्त्री मोहनविक्रम सिंहको प्रमुख आतिथ्यमा २०७९ पुस २३ गते शनिबार रुपन्देहीको बुटवलस्थित राष्ट्रिय जनमोर्चाको क्षेत्रीय कार्यालयमा सम्पन्न भएको छ ।
कार्यक्रमको विशिष्ट अतिथिमा राष्ट्रिय जनमोर्चाका कार्यकारी अध्यक्ष रश्मीराज नेपाली हुनुहुन्थ्यो । उहाँले तेस्रो साधारण सभाको उद्घाटन गमलामा पानी राखेर गर्नुभएको थियो ।
कार्यक्रममा नयाँ कार्यसमितिलाई बधाई दिँदै प्रमुख अतिथि मसाल महामन्त्री मोहनविक्रम सिंहले विश्व कम्युनिस्ट आन्दोलन रक्षात्मक अवस्थामा पुगेकाले कम्युनिस्ट सङ्ग्रहालयको महत्त्व अझ बढेर गएको बताउनुभयो ।
साधारण सभाले चेतनाथ आचर्यको अध्यक्षतामा १३ पूर्ण सदस्य र पाँच सल्लाहकारसहितको समिति चयन गरेको छ । समितिको उपाध्यक्षमा बद्रे आलम, महासचिवमा हरि आचार्य, सचिवमा लीलाबहादुर केसी र कोषाध्यक्षमा तारा थापा चयन हुनुभएको छ । त्यसैगरी, सदस्यहरूमा भैरवराज रेग्मी, दुर्गा पौडेल, गणेश गौतम, नारायणबहादुर जिसी, विशाल दर्लामी, लक्ष्मणदेव पाण्डे, ढुन्डिराज शर्मा र पदम श्रेष्ठ रहनुभएको छ ।
त्यस्तै, समितिको सल्लाहकारमा रश्मीराज नेपाली, तुलप्रसाद विश्वकर्मा, खेम कोइराला ‘बन्धु’ र काजीगाउँले श्रेष्ठ रहनुभएको छ ।
कार्यक्रम अध्यक्षता कम्युनिस्ट सङ्ग्रहालयका अध्यक्ष चेतनाथ आचार्यले गर्नुभएको थियो भने सञ्चालन सङ्ग्रहालयका महासचिव खेम कोइराला ‘बन्धु’ ले गर्नुभएको थियो । स्वागत मन्तव्य दुर्गानाथ खरेलले गर्नुभएको थियो ।
साधारण सभाको बन्दशत्रमा लोकराज भुसाल, काजीगाउँले श्रेष्ठ र पवित्रा जिसी रहनुभएको निर्वाचन मण्डल बनाइएको थियो । सभामा प्रगति प्रतिवेदन अध्यक्ष चेतनाथ आचार्यले र आर्थिक प्रतिवेदन कोषाध्यक्ष हरि आचार्यले पेस गर्नुभएको थियो ।
कार्यक्रममा राष्ट्रिय जनमोर्चाका नेता बोमबहादुर खत्री र लुम्बिनी प्रदेससभामा राजमोकी सांसद तारा थापा र राष्ट्रिय सभामा राजमो सांसद तुलप्रसाद विकको पनि आतिथ्य रहेको थियो ।
