मलङ्गवा । मधेस प्रदेशमा छ दलसम्बन्ध किसान सङ्गठन सम्मिलित प्रदेश स्तरीय संयुक्त किसान सङ्घर्ष समिति गठन भएको छ ।
नेपाली किसान र कृषिका राष्ट्रिय तथा अन्तर्राष्ट्रिय स्तरका गम्भीर समस्यालाई लिएर सङ्घर्षको तयारी गरिरहेका किसान सङ्गठनको सर्लाहीमा २०७९ पुस १३ गते सम्पन्न भेलाले २५ सदस्यीय सङ्घर्ष समिति गठन गरेको हो ।
हरिनारायण महतो संयोजक रहनुभएको सङ्घर्ष समितिमा राजेन्द्रसाह तेली, श्रवणकुमार लोचन, विष्णुलाल सिंह, रामप्रसाद चौधरी, मोदनारायण महतो, प्रेम बराल, बतहु यादव, धर्मानन्द सुवेदी, राम नाथ, अक्षयकुमार मण्डल, अनबरी खातुन, रामकुमरी महतो, सोम कार्की, जीवन भट्टराई, रामप्रसाद अधिकारी, अमरदेव पासवान, पवन झा, रामचन्द्र सिंह कुशवाह, धनबहादुर मिरचन, हरिकिशोर महतो, रामवरण ठाकुर, अनुप चौधरी, थिनेश्वर मिश्र र राम विनय रहनुभएको छ ।
अखिल नेपाल किसान सङ्घ (अप्फा), अखिल नेपाल किसान महासङ्घ (क्रान्तिकारी केन्द्र), अखिल नेपाल किसान महासङ्घ, अखिल नेपाल किसान महासङ्घ (क्रान्तिकारी), अखिल नेपाल किसान यूनियन र अखिल नेपाल प्रगतिशील किसान सङ्घ आबद्ध किसान सङ्गठन सम्मिलित यो संयुक्त समिति हो ।
छ वाम किसान सङ्गठनले गत साउन १४ गते नै प्रधानमन्त्रीसमक्ष ५९ बुँदे किसान र कृषिसम्बन्धी माग प्रस्तुत गरिसकेका छन् । अब पुन: प्रधानमन्त्रीलाई स्मरणपत्र दिनुका साथै सम्पूर्ण सङ्घीय सांसद, प्रदेश मुख्यमन्त्री र सांसद तथा प्रमुख जिल्ला अधिकारी र स्थानीय सरकारलाई पनि जानकारी गराएर किसान आन्दोलन अघि बढाइने जानकारी केन्द्रीय सङ्घर्ष समितिका सदस्यहरूले बताएका छन् ।
भेलाको सहजीकरण अखिल नेपाल किसान महासङ्घ (क्रान्तिकारी केन्द्र) का महासचिव नहेन्द्र खड्काले गर्नुभएको थियो भने अखिल नेपाल किसान महासङ्घका अध्यक्ष बलराम बास्कोटा, अखिल नेपाल किसान महासङ्घ (अप्फा) का अध्यक्ष भैरवराज रेग्मी, अखिल नेपाल किसान महासङ्घ (क्रान्तिकारी) अध्यक्ष सीताराम तामाङ, अखिल नेपाल किसान यूनियनका इन्चाज लोकनारायण सुवेदी, अखिल नेपाल प्रगतिशील किसान सङ्घका अध्यक्ष दुर्गाप्रसाद जैसी तथा अखिल नेपाल किसान यूनियनका अध्यक्ष रामदुलार महतोले भेलालाई सम्बोधन गर्दै सशक्त किसान आन्दोलनको अनिवार्य आवश्यकता र औचित्यबारे चर्चा गर्नुभएको थियो ।
अखिल नेपाल किसान महासङ्घका महासचिव प्रमेश पोखरेलले स्वागत मन्तव्य राख्नुभएको उक्त कार्यक्रममा अन्य किसान नेताले पनि कृषक आन्दोलनबारे बोल्नुभएको थियो ।
