काठमाडौं । समाजवादी केन्द्र नेपालका सर्वोच्च नेता युवराज सफलले उच्चस्तरीय नागरिकता छानबिन गर्न माग गर्दै प्रधानमन्त्रीलाई निवेदन दिएका छन् ।
शुक्रबार प्रधानमन्त्री कार्यालयमा पठाएको निवेदनमा सफलले नागरिकता जस्तो कुरामा खेलाँची गर्दा मुलुकको राष्ट्रियता समेत कमजोर हुने र कालान्तरमा नेपाली असली नागरिक अल्पमतमा पर्ने हो कि भन्ने खतरा देखिएको बताएका छन् ।
हाल कम्तीमा सवा करोड गैर नेपाली नागरिकले झुटो विवरण लिएर नागरिकता प्राप्त गरेको उनले उल्लेख गरेका छन् ।
साथै उनले राजेन्द्र महतो भारतीय नागरिक भएको भन्ने सार्वजनिक भएको, पुर्व उपराष्ट्रपति परमानन्द झा समेत भारतीय नागरिक भएको, सुजता कोइराला जर्मन नागरिक भएको, पूर्व गृह राज्यमन्त्री देवेन्द्र राज कँडेल भारतीय नागरिक रही चुनावसमेत लडेको, माइती नेपालका संस्थापक अनुराधा कोइराला भारतीय नागरिक रहेको, भरतपुर महानगरपालिकाका मेयर रेणु दाहालले भारतको जालान्धरमा भारतीय नागरिकसँग विवाह गरेका कारण निज भारतीय नागरिक भएको लगायतका कुराहरु सार्वजनिक भएकाले उल्लेखित व्यक्तिहरुको नागरिकता र राष्ट्रियताको विषय छानबिन गरी राष्ट्र र जनतालाई सो कुराको सत्यतथ्य जानकारी गराउन आवश्यक रहेकोले तत्काल छानबिन गर्न गृह मन्त्रालयलाई निर्देशन दिन समेत आग्रह गरेका छन्।
‘त्यस्तै हालसम्म कति नेपाली नागरिकले नेपाली नागरिक कायम हुँदैको बखत पिआर र ग्रिनकार्ड लगायत लिएका छन् निजहरुको विवरण समेत सार्वजनिक गर्न आवश्यक देखिएको छ’ उनले लेखेका छन्, ‘नेपालका उच्च पदस्थ व्यक्तिहरुले कानुन विपरित दोहोरो नागरिकता, पीआर, ग्रिनकार्ड लिएको आशंका बेलाबखत गरिन थालेकोले अमेरिका, बेलायत लगायत देशमा सम्पर्क गरी त्यस्तो सुविधा लिने नागरिकको विवरण तत्काल झिकाई त्यस्तो गतिविधिमा संलग्नहरुलाई कारबाही गरी कानुनी दायरामा ल्याउन समेत माग गर्दछु ।’
