धनगढी । अखिल नेपाल जनजाती सम्मेलनले मुक्त कमैया पुनस्र्थापनाको माग गर्दै ‘कञ्चनपुर–दाङ’ अभियान सुरु गरेको छ । आइतबार महेन्द्रनगरबाट सुरु भएको कार्यक्रम आज (सोमबार) धनगढी पुगेको छ । धनगढीमा मुक्त कमैयाहरुसँग अन्तरक्रिया गरी प्रमुख जिल्ला अधिकारीलाई ज्ञापन पत्र बुझाइनेछ ।
अभियान अन्तर्गत कञ्चनपुरदेखि–दाङसम्म मुक्त कमैया बस्तीमा भेटघाट, सबै जिल्ला प्रशासन कार्यालयमा पुगेर ज्ञापन पत्र बुझाउने तथा अन्तरक्रिया गर्ने कार्यक्रम रहेको सम्मेलनका महासचिव रामबहादुर बुढाले जानकारी दिनुभयो । त्यसै क्रममा आइतबार कञ्चनपुरका प्रमुख जिल्ला अधिकारीलाई सम्मेलनले १६ बुँदे ज्ञापनपत्र बुझाएको छ ।
ज्ञापन पत्र बुझाउनुअघि कञ्चनपुर जिल्ला समन्वय समिति को हलमा ‘मुक्त कमैयाको समस्या र समाधान बिषयक’ अन्तरक्रिया कार्यक्रम सम्पन्न भएको थियो । कार्यक्रममा बोल्दै मुक्त कमैया लक्ष्मी डँगौराले सरकारले मुक्त कमैया पुनस्र्थापनाका लागि ५ कठ्ठा जग्गा दिएपनि खोलाको किनार र बगरमा दिएको जग्गा अधिकांशको खोलाले बगाएको बताउनुभयो । कञ्चनपुरमा करिब ६० परिवार मुक्त कमैयासँग अहिले हातमा लालपुर्जा भएको तर, जग्गा भने खोलाले बगाएर सुकुम्बासी बनेको उहाँले बताउनुभयो ।
सम्मेलनका केन्द्रीय अध्यक्ष निम बहादुर बुढाको प्रमुख आतिथ्यतामा भएको कार्यक्रममा महासचिव रामबहादुर बुढाले आधारपत्र वाचन गर्नुभएको थियो ।
अतिथिमा तराई मधेश जनबादी मोर्चाका महासचिव राजाराम चौधरी, जातीय समता समाजका महासचिव गोबिन्द बिक, नेकपा (मसाल) कञ्चनपुर जिल्ला प्रवक्ता लक्ष्मीदत्त बडु, राष्ट्रिय जनमोर्चा कञ्चनपुर जिल्ला सचिव अहिमान थापा, जनजाति सम्मेलनका केन्द्रीय उपाध्यक्ष लाल बहादुर रानामगर, अखिल (छैठौं) का महासचिव महेशराज जोशी, अखिल नेपाल सुकुम्बासी संघका केन्द्रीय सदस्य लालबहादुर कुँवर, अन्टुकका सुप प्रदेश सयोंजक जनक कुँवरलगायत नेताहरुको आतिथ्यता रहेको थियो । कार्यक्रमको अध्यक्ष्यता अखिल नेपाल जनजाति सम्मेलन कञ्चनपुर सयोंजक राजकुमार चौधरी, सञ्चालन रंग बहादुर चौधरी र स्वागत भुवन चौधरीले गर्नुभएको थियो ।
२०५७ साल साउन २ गते कमैया मुक्तिको घोषणा भएपनि उनीहरुको अझैसम्म उचित पुनस्र्थापना हुन सकेको छैन । दाङ र कञ्चनपुरमा पुनस्र्थापना कार्य सम्पन्न भएको सरकारी रेकर्ड छ तर, व्यवहारमा उनीहरु पुनः कमैया बस्नुपर्ने अवस्था छ । अन्य जिल्लामा भने पुनस्र्थापना कार्य सकिएको छैन । जनजाती सम्मेलनले पुनस्र्थापनाका लागि दबाब दिन माघ ५ देखि १२ गतेसम्म ‘कञ्चनपुर–दाङ अभियान’ सञ्चालन गरेको हो ।
