सुमन आचार्य, नारायणगढ ।
नेकपा (मसाल) का पार्टी सदस्य महानन्द शर्मा (का. गाउँले) को निधनबाट शोकमग्न बनेको नेकपा (मसाल) चितवनले मंगलबार चितवन जिल्लास्थित देवघाट धाममा शोकसभा सम्पन्न गरेको छ । शर्माको सम्झनामा एक मिनेट मौनधारणका साथै नेकपा (मसाल) चितवनका प्रवक्ता मेघराज ढकालले शोक मन्तव्य वाचन गरी शर्माको पार्थिव शरीरमाथि कम्युनिस्ट पार्टीको झण्डा ओढाउनुभएको थियो ।
नेकपा (मसाल) चितवन र सम्बद्ध मोर्चा तथा जनवर्गीय सङ्गठनले संयुक्त रूपमा शर्माको निधनको सातौँ दिन पुस २८ गते भरतपुर महानगरपालिका वडा नं. ७ लालिगुराँस चोकस्थित उहाँको निवासमा श्रद्धाञ्जली सभा सम्पन्न गरेका छन् । राजमोका जिल्ला सचिव पुष्पकमल सुवेदीको अध्यक्षता रहेको उक्त कार्यक्रममा नेकपा (मसाल) चितवनका प्रवक्ता मेघराज ढकालले श्रद्धाञ्जली मन्तव्य राख्नुभएको थियो ।
त्यसैगरी कार्यक्रममा राजमो केन्द्रीय सदस्य एवं जिल्ला अध्यक्ष डम्बर पुरी र राजमो रत्ननगर नगर समितिका अध्यक्ष नारायण आचार्यले मन्तव्य राख्नुभएको उक्त कार्यक्रमको सञ्चालन राजमो भरतपुर महानगर समितिका सचिव सुमन आचार्यले गर्नुभएको थियो । कार्यक्रमा नेकपा (मसाल) का पूर्व केन्द्रीय प्रवक्ता विमल शर्मा र राजमो नवलपुर जिल्ला अध्यक्ष दिपक पाण्डेलगायतका नेता/कार्यकर्ताको समेत उपस्थिति रहेको थियो ।
शर्मा लामो समयसम्म दक्षिण भारतको पाण्डिचेरीमा मूल प्रवाह तत्कालीन अखिल भारत नेपाली वामपन्थी युवक मोर्चा र मूल प्रवाह अखिल भारत नेपाली एकता समाजमा काम गरी २०५९ मा चितवन जिल्लाको रत्ननगर नगरपालिका–१ मा बस्दै आउनुभएको थियो । २०७४ सालको स्थानीय तहको निर्वाचनमा राष्ट्रिय जनमोर्चाका तर्फबाट रत्ननगर नगरपालिकाको प्रमुख पदका उम्मेदवारसमेत बन्नुभएको शर्माको जन्म अनन्तप्रसाद उपाध्याय र माता लीलावति शर्माका माइलो सन्तानको रूपमा २०२० जेष्ठ १५ गते साविक बागलुङ पैयुँथन्थाप गाविस–३ मा जन्मनुभएको थियो ।
शर्माको ५६ वर्षको उमेरमा पुस २२ गते काठमाडौँस्थित वीर अस्पतालमा निधन भएको थियो । उहाँका श्रीमती, एक छोरा, दुई छोरी/ज्वाइँ, तीन नाती र दुई नातिनीहरू हुनुहुन्छ ।
