धनगढी । राष्ट्रिय जनमोर्चा, कैलालीको चुनाव प्रचार टोलीमाथि कैलालीमा आक्रमण भएको छ । बिहीबार साँझ चुनाव प्रचारबाट फर्किंदै गर्दा कैलालीको गोदावरी नगरपालिका–३ चौकीडाँडामा राजमो नेताहरु सवार गाडीमा ढुंगा प्रहार भएको हो ।
ढुंगा प्रहारबाट बा १८ च ७८१२ नम्बरको गाडीको सिसा फुटेको राजमो केन्द्रीय सदस्य एवम् सुदूरपश्चिम प्रदेश अध्यक्ष नन्दराज भट्टले जानकारी दिनुभयो ।
आफूहरुमाथि भएको आक्रमणबारे स्थानीय प्रशासनलाई जानकारी गराइसकिएको बताउँदै भट्टले आक्रमणकारीहरुलाई कडा कारबाही गर्न माग गर्नुभयो ।
यसैबीच राष्ट्रिय जनमोर्चा कैलालीले अपराधीमाथि कारबाहीको माग गरेको छ । जिल्ला अध्यक्ष जगत जोशीले प्रेशित गर्नुभएको विज्ञप्तिमा प्रतिगमनका मतियार, विखण्डनकारीको निर्देशनमा राजमोमाथि आक्रमण भएको उल्लेख छ ।
‘प्रतिनिधिसभा तथा प्रदेश सभा निर्वाचन २०७९ को प्रचार प्रसार अवधिको अन्तिम दिन आज गोदावरी नपा वडा न. ३ मा घरदैलो गरी फर्किने क्रममा हाम्रो पार्टीका केन्द्रीय सदस्य तथा सुदूरपश्चिम अध्यक्ष कमरेड नन्दराज भट्ट सहितका कमरेडहरु सवार रहेको कमरेड नन्दराज भट्टको बा१ च ७८१२ नम्बरको निजि कारमा ढुङा प्रहार भएको छ’ विज्ञप्तिमा भनिएको छ, ‘ साँझ ५ बजेको समयमा घर फर्किने क्रममा अज्ञात समूहबाट गरिएको ढुङ्गा प्रहारबाट गाडीको सिसा फुटेको छ भने प्रचारकर्ता तथा केन्द्रीय सदस्यलाई चोट नलागेको जानकारी गराउँदछौँ ।’
विज्ञप्तिमा अगाडि भनिएको छ, ‘राष्ट्रिय जनमोर्चाको झण्डा र चुनाव चिह्न गिलास रहेको गाडीमा प्रहार भएकोले उक्त प्रहार प्रतिगमनका मतियार, विखण्डनकारीको निर्देशनमा रहेको बुझ्न सकिन्छ। यसप्रकारको कायर मानसिकताको घोर भत्सर्ना गर्दछौँ। साथै उक्त कार्यमा संलग्न दोशिमाथी कडा कारबाहिको लागि प्रसासन सङ माग गर्दछौँ ।’
