जनकपुरधाम । अवैध रुपमा खोला उत्खननको विरोध गर्दै आएका एक युवकको धनुषामा हत्या गरिएको छ । धनुषाको मिथिला नगरपालिका–५ श्रीपुरका २४ वर्षीय ओमप्रकाश भनिने दिलीपकुमार महतोको टिपरले किचेर हत्या गरिएको प्रत्यक्षदर्शीले बताएका छन् ।

शुक्रबार बिहान पाँच बजे छिमेकी साथी रोशन यादवसँग मर्निङवाक गएको बेला घर नजिकैको खोलामा ना ७ ख ६४१३ नम्बरको टिपरले ठक्कर दिँदा उनको मृत्यु भएको हो । लामो समयदेखि उत्खननको विरोध गर्दै आएका महतोको नियोजित रुपमा हत्या गरिएको बताएका छन् ।

महतोको शव प्रहरीले बरामद गरेको छ भने टिपर नियन्त्रणमा लिएको छ । टिपर चालक फरार छन् । उनको खोजी भइरहेको प्रहरीले जनाएको छ ।

दीलिपले पहिलादेखि नै अवैध रुपमा हुँदै आएको खोला उत्खनननको विरोध गर्दै आएका थिए। सोही कारण क्रसर सञ्चालकले उनको नियोजित रुपमा हत्या गरेको स्थानीयले बताएका छन्।

घटनाको विरोधमा स्थानीयले मिथला नगरपालिकाको श्रीपुर स्थित रामलक्ष्मण चोकमा सडकमा टायर बालेर पूर्वपश्चिम राजमार्ग अवरुद्ध गरेका छन्। महतो भारतमा इन्जिनियरिङ पढ्दै गरेका थिए ।