काठमाडौं । वरिष्ठ साहित्यकार एवम् नेकपा (मसाल) का महामन्त्री मोहनविक्रम सिंहको बहुप्रतिक्षित उपन्यास ‘कामरेड जलजला’ को विमोचन मंसिर १ गते नहुने भएको छ ।
मंसिर १ को प्रतिक्षामा बसेका पाठकलाई निरास पार्दै सिंहले सो मितिमा उपन्यासको विमोचन सम्भव नभएको बताउनुभएको छ ।
बुधबार सामाजिक सञ्जाल फेसबुकमा स्ट्याटस लेख्दै सिंहले उपन्यास पुरै तयार भइसकेको भएपनि एक पटक प्रुफ रिडिङ गर्नुपर्ने र यहीबीचमा चुनाव परेकोले चुनावमा व्यस्त हुनुपर्दा अहिले विमोचन सम्भव नभएको स्पष्ट पार्नुभएको छ ।
‘हामीले पहिले मंसीर १ गते “कामरेड जलजला” उपन्यासको विमोचन गर्ने बताएका थियौँ’ सिंहले लेख्नुभएको छ, ‘तर त्यही बीचमा आम चुनावको मिति परेकाले र केही महिना त्यसमा व्यस्त हुनु परेकाले मंसिर १ गते उक्त उपन्यासको विमोचन सम्भव हुन गएन ।’
सिंहले यसअघि पटक पटक मिति तोकेर सार्नुपर्ने अवस्था आएका कारण अब विमोचनको मिति नतोक्ने तर, आउँदो साउन महिनासम्म विमोचन हुनसक्ने पनि बताउनुभएको छ ।
करिब दुई दशकदेखि सिंहले लेख्न थाल्नुभएको कामरेड जलजला उपन्यास झण्डै १२ सय पृष्ठको हुने बताइएको छ । उपन्यासमा तत्कालिन नेपाल र विश्व परिवेशको चर्चा छ ।
