काठमाडौं । नेपालमा बसेर चीनमा साइबर अपराधमा संलग्न रहेका १ सय २२ चिनियाँ नागरिकलाई अध्यागमन विभागले एकदेखि दुई हजार रुपैयाँ जरिवाना गराएको छ । उनीहरुलाई ४ वर्षका लागि नेपाल प्रवेश निषेध गरिएको छ।
अध्यागमन विभागले ३४ जनालाई दुई हजार रुपैयाँ र बाँकी ८८ जनालाई जनही एकहजार रुपैयाँ जरिवानाको निर्णय भएको बताए। यसअघि काठमाडौं जिल्ला प्रशासन कार्यालयले प्रतिब्यक्ति एक हजार रुपैयाँ जरिवाना गराएको थियो ।
केन्द्रीय अनुसन्धान ब्युरोको नेतृत्वमा प्रहरीको अपराध महाशाखा र काठमाडौं प्रहरीको संयुक्त कारबाहीमा पुस ७ गते १ सय २२ जना चिनियाँ नागरिक पक्राउ परेका थिए ।
नेपालमा बसेर चीनमा अनलाइन जुवा, बैंकिङ कसुर र अनलाइनमा अश्लील यौनजन्य सामग्रीको अवैध कारोबारमा संलग्न उनीहरु पर्यटन भिसामा नेपाल आएका थिए । प्रहरीको लापरबाहीका कारण संगठित गिरोहका नाइके भने उम्किन सफल भएका छन् ।
बुधबार फिर्ता लैजाँदै चीन सरकार
नेपालमा पक्राउ परेका १ सय २२ जना आफ्ना नागरिकलाई चीन सरकारले बुधबार फिर्ता लैजाँदै छ । नेपालस्थित चिनियाँ दूतावासले सोमबार अपराह्न अध्यागमन विभागलाई नेपालमा पक्राउ परेका १ सय २२ जनाको इन्ट्री परमिट बुझाएलगत्तै उनीहरुलाई फिर्ता लैजाने प्रक्रिया सुरु भएको हो ।
बुधबार साँझ चाइना साउदर्न र चाइना इस्टर्नका जहाजमा क्रमशः ८० जना र ४२ जनाको बेग्लाबेग्लै टोली बनाएर फिर्ता लैजान दूतावासले विभागलाई पत्राचार गरेको छ।
विभागका अनुसार चाइना इस्टर्नमा ४२ जना बुधबार साँझ ७ बजेर १५ मिनेटमा र चाइना साउदर्नमा ८० जना बुधबार साँझ ७ बजेर ४५ मिनेटमा चीन फिर्ता हुनेछन् ।
