बागलुङ बजार । गलकोट नगरपालिका–६ मजुवा फाँटमा २०७९ असोज २८ शुक्रबारदेखि गलकोट सांस्कृतिक तथा खेलकुद महोत्सव–२०७९ सुरु भएको छ ।
ड्रिम टिम गलकोटद्वारा आयोजित उक्त महोत्सवको गलकोट नगरपालिकाका उपप्रमुख फमलाल निउरेले उद्घाटन गर्नुभएको हो ।
सो अवसरमा उहाँले महोत्सवबाट आर्थिक गतिविधि बढ्नुका साथै खेल, कला र संस्कृतिको प्रवद्र्धनमा टेवा पुग्ने बताउनुभयो । कात्तिक ७ गतेसम्म चल्ने महोत्सवमा खुला भलिबल प्रतियोगिता, एकल नृत्य, गायन, रत्यौली, माछा छोप्ने (हत्केला खेल्ने), पुरुष रस्साकस्सी, दौड, ब्याडमिन्टनलगायत प्रतियोगिता राखिएको छ ।
कृषिउपज, स्थानीय तथा स्वदेशी उत्पादन, पुरातात्त्विक वस्तु र झाँकी पनि महोत्सवको आकर्षणका रूपमा रहेको आयोजक संस्थाका अध्यक्ष रूपक पाण्डेले जानकारी दिनुभयो । महोत्सवमा मौलिक कला, संस्कृतिको प्रदर्शन, रमाइलो मेला, बाल उद्यान र साङ्गीतिक कार्यक्रम पनि सञ्चालन हुने छ ।
व्यापार, खेलकुद, स्थानीय कला, संस्कृतिको प्रवद्र्धनसँगै मनोरञ्ज गतिविधिका लागि महोत्सव आयोजना गरिएको अध्यक्ष पाण्डेले बताउनुभयो ।
महोत्सवस्थलमा एक सय २० ओटा व्यापारिक स्टल रहेका छन् । ११ दिनसम्म सञ्चालन हुने महोत्सवमा झन्डै रु एक करोडको कारोबार हुने आयोजकको अनुमान छ ।
महोत्सव अवधिभर हेलिकोप्टरबाट घुम्टे दर्शनसहित गलकोट आसपासका पर्यटकीयस्थलको अवलोकन पनि गर्न पाइने भएको छ । महोत्सवमा राष्ट्रिय तथा स्थानीयस्तरका कलाकारको साङ्गीतिक प्रस्तुति पनि रहने कार्यक्रम संयोजक हुम थापाले बताउनुभयो ।
हाँस्य कलाकार मनोज गजुरेल, गायक शिव परियारलगायत कलाकार आउने तय भइसकेको उहाँको भनाइ छ । महोत्सवको मुख्य आकर्षणका रूपमा रहेको पालिका स्तरीय भलिबल प्रतियोगिताका विजेताले रु दुई लाख ११ हजार एक सय ११ र उपविजेताले एक लाख ११ हजार एक सय ११ प्राप्त गर्ने जनाइएको छ ।
गायनतर्फ भ्वाइस अफ गलकोटका विजेतालाई रु ३० हजार र नृत्यका विजेतालाई रु ३० हजार तीन सय ३३ पुरस्कार प्रबन्ध गरिएको कार्यक्रम संयोजक थापाले जानकारी दिनुभयो । गत वर्ष पुसपछि ड्रिम टिम गलकोटले दोस्रोपटक सांस्कृतिक तथा खेलकुद महोत्सव आयोजना गरेको हो । (रासस)
