नेपाल कम्युनिष्ट पार्टी (मसाल) ले पार्टीभित्र मतभेदको अधिकार सुरक्षित रहेको स्पष्ट पारेको छ । पार्टीको राष्ट्रिय परिषद बैठकमा महामन्त्री मोहनविक्रम सिंहद्वारा प्रस्तुत र पारित प्रतिवेदनमा मतभेदको अधिकारलाई सधैँ पार्टीले आदर गर्ने र सुरक्षित राख्ने प्रयत्न भइरहेको जनाइएको छ ।
तर, मतभेदका नाममा देखा पर्ने पार्टी अनुशासनविहीन गतिविधि तथा स्वेच्छाचारितालाई भने पार्टीले रोक्ने प्रतिवेदनमा उल्लेख छ ।
प्रतिवेदनमा भनिएको छ, ‘पार्टी सदस्यहरूको मतभेदको अधिकारलाई सधैँ आदर गर्दै आएका छौँ र त्यसलाई पूरै सुरक्षित राख्ने हाम्रो प्रयत्न भइरहने छ । तर हाम्रो जोड यो कुरामा छ कि त्यस प्रकारको अधिकार जनवादी केन्द्रीयता तथा छलफलको स्वतन्त्रता र कामको एकता वा पार्टीको विधान, नियम र अनुशासन अन्तरगत नै हुनुपर्दछ । त्यसबारे देखाइने कुनै पनि प्रकारको अनुशासनविहीनता, अराजकता वा स्वेच्छाचारिताका प्रवृत्तिहरूले पार्टीको एकता र अनुशासनलाई मात्र होइन, पार्टीको राजनैतिक भूमिका वा आन्दोलनमा समेत आघात पुर्याउने गर्दछन् । त्यसकारण त्यस प्रकारका अनुशासनविहीन प्रवृत्तिहरूलाई रोक्नका लागि हाम्रो पार्टीले संधै प्रयत्न गर्दै आएको छ र गर्नु पनि पर्दछ ।’
आठौँ महाधिवेशनपछि पार्टीमा छिटपुटबाहेक अनुशासन उल्लंघनका घटना नदेखिएको भन्दै प्रतिवेदनमा दक्षिणपन्थी वा उग्रवामपन्थी भड्कावका ठुलठुला घटना सामना गरेका पार्टीका लागि ति ‘सामान्य’ भएको बताइएको छ ।
‘हामीले गतकालमा अनुशासनविहीनता र फुट वा दक्षिणपन्थी वा उग्र‘वामपन्थी’ भड्कावहरूका ठूलठूला घटनाहरूको सामना गर्दै वा तिनीहरूमाथि नियन्त्रण गर्न सफल हुँदै आएका छौँ । तिनीहरूका तुलनामा अहिले पार्टीमा देखा परेका अनुशासनविहीनताका छिटफुट प्रवृत्तिहरू सामान्य नै हुन् ।’ प्रतिवेदनमा भनिएको छ, ‘समग्र रूपमा विचार गर्ने हो भने महाधिवेशनपछि पूरै पार्टी अनुशासित र एकतावद्ध भएर अगाडि बढिरहेको छ । त्यसकारण अहिले देखापरेका अनुशासनविहीनताका केही प्रवृतिहरूलाई समाधान गर्दै पार्टीलाई अनुशासित र एकतावद्ध गर्दै क्रान्तिकारी आन्दोलनलाई अगाडि बढाउन सफल हुनेछौँ भन्ने कुरामा हामीलाई पूरा विश्वास छ ।’
