नेपाल कम्युनिष्ट पार्टी (मसाल) ले पार्टीविरोधी तत्व, घुसपैठिया छद्मभेषीहरूको ध्वंसात्मक कार्यहरूप्रति कडा रुपमा प्रस्तुत हुनुपर्ने आवश्यकता औंल्याएको छ । इमान्दार पार्टी सदस्यहरुले गर्ने कमजोरी र पार्टीलाई ध्वस्त पार्न खोज्ने घुसपैठिया वा छद्मभेषीबीचको अन्तर बुझेर त्यसै अनुसार ब्यवहार गर्ने पार्टीले स्पष्ट पारेको छ ।
पार्टीको हालै सम्पन्न आठौँ महाधिवेशनपछिको पहिलो राष्ट्रिय परिषद बैठकबाट पारित राजनीतिक प्रतिवेदनमा महाधिवेशनपछि पार्टी अनुशासन र एकतामा धेरै नै सुधार भएको उल्लेख छ ।
पार्टीलाई ध्वस्त पार्न चाहने पार्टीविरोधी तत्व, घुसपैठिया र छद्मभेषीहरू तथा विभिन्न गल्ती कमजोरी गर्ने इमान्दार पार्टी सदस्यको बीचमा मौलिक अन्तर हुने स्पष्ट पारिएको छ । सोही आधारमा पार्टीले उनीहप्रतिको ब्यवहार र अनुशासनको कारबाहीमा पनि अन्तर गर्ने जनाइएको छ ।
महामन्त्री मोहनविक्रा सिंहद्वारा प्रस्तुत सो प्रतिवेदनमा भनिएको छ, ‘पार्टीका इमानदार सदस्यहरूले अनुशासनसम्बन्धी गल्ती कमजोरी गरे हाम्रो उनीहरूप्रति व्यवहार मैत्रीपूर्ण नै हुनुपर्दछ र हाम्रो प्रयत्न उनीहरूलाई सुधार्नेतर्फ नै हुनुपर्दछ । पार्टीमा प्रवेश गरेका पार्टीविरोधी तत्व, घुसपैठिया छद्मभेषीहरूको ध्वंसात्मक कार्यहरूप्रति हामी कडा रूपमा प्रस्तुत हुनुपर्दछ र त्यसरी नै हामीले पार्टीलाई बचाउन सक्ने छौँ ।’
प्रतिवेदनमा महाधिवेशनपछि पनि फाट्टफुट्ट अनुशासन उल्लंघनका घटना देखा परेको उल्लेख गर्दै भनिएको छ, ‘महाधिवेशनपछि पनि अनुशासनसम्बन्धी कतिपय समस्या छिटफुट रूपमा देखापर्ने गरेका छन् । उदाहरणका लागि, महाधिवेशनपछि पनि पार्टीका कतिपय गोप्य निर्णय वा सर्कुलरहरू बाहिर जाने काम भइरहेको छ । पार्टीभित्रका कैयौँ गोप्य सूचनाहरू विभिन्न पत्रपत्रिका वा अनलाइनहरूमा प्रकाशित हुने गरेका छन् । यहाँसम्म कि विभिन्न छद्म नामहरूबाट महाधिवेशनका निर्णय वा पार्टी नीतिहरूमाथि सार्वजनिक रूपले नै हमला हुने कार्यहरू भइरहेका छन् । बताइरहनुपर्ने आवश्यकता छैन, त्यस प्रकारको हमलाको उद्देश्य क्रान्तिकारी आन्दोलनलाई कमजोर पार्नु वा पार्टीलाई ध्वस्त गर्नु नै हुन् । त्यसबाट पार्टीभित्र पार्टीविरोधी तत्वहरूको घुसपैठ भएको कुरालाई पनि बताउँछ र त्यसबारे पार्टीका सबै समिति र सदस्यहरूमा उच्च प्रकारको शतर्कताको आवश्यकता छ । त्यस प्रकारको शतर्कताका आधारमा नै पार्टीविरोधी तत्वहरू, छद्म नामधारीहरू वा घुसपैठियाका षडयन्त्रहरूलाई हामीले पूर्ण रूपमा असफल पार्न सक्ने छौँ ।’
यस्तै, पार्टीको वैधानिक साप्ताहिकमाथि व्यक्तिगत स्वामित्व कायम गर्ने जस्तो चरम प्रकारको अनुशासनविहीनता देखा परेको भन्दै त्यसले पार्टीमा जरा हालेको गम्भीर प्रकारको अनुशासनविहीनतालाई देखाएको बताइएको छ ।
राजनीतिक प्रतिवेदनमा पार्टीको अनुशासन वा एकता कमजोर भयो भने हामीले शक्तिशाली प्रकारले आन्दोलन सङ्गठित गर्न नसक्ने कुरा प्रष्ट छ भन्दै त्यस प्रकारका सबै अनुशासनविहीन गतिविधिहरूलाई नियन्त्रण गर्न वा सुधार गर्नका लागि हामीले लगातार प्रयत्न गरिरहेको बताइएको छ ।
‘त्यस सिलसिलामा चरम प्रकारको अनुशासनविहीनता देखाउने कतिपय पार्टी सदस्यहरूलाई अनिश्चित कालको लागि पार्टी बाट निस्काशित गर्ने गरेका छौँ भने सामान्य गल्ती कमजोरीको लागि बिभिन्न प्रकारका आन्तरिक कारवाही पनि गर्नु परेको छ । तर त्यस प्रकारको कारवाही गरेपनि उनीहरूलाई सुधार्ने तथा अनुशासित र जिम्मेवार पार्टी सदस्य बनाउने नै हाम्रो कार्यशैली रहँदै आएको छ र आउने दिनहरूमा पनि हामीले त्यही प्रकारको कार्यशैलीलाई अपनाउँदै जाने छौँ’ प्रतिवेदनमा भनिएको छ ।
