मेघराज रिष्मेली, टोकियो (जापान) ।
नेपालीहरूको प्रसिद्ध पर्वमा सबै रमाइरहेका छन । आफन्त भेटघाट चलिरहेको छ । यस्तै जमघट ४२ वर्षीय गीताकुमारी गुरुङ (सविना गुरुङ) को परिवारमा पनि हुनुपर्ने थियो तर अफसोच, आठ वर्षपछि आफ्नो अर्कों सन्तानलाई यस धर्तीमा पदार्पण गराएको खुसीको एक महिना नबित्दै उनको परिवारमा बज्रपात परेको छ ।
नेपाल स्याङ्जा घर भई हाल जापानको गुन्माकेन इसेसाकी नगरमा श्रीमानसँगै पाँच वर्षदेखि बस्दै आएकी सबिनाको एक महिनाअघि सुत्केरी भएपश्चात् रक्तस्राव भइरहेपछि त्यसको शल्यक्रियामार्फत उपचार गराउँदा–गराउँदै अक्टोबर ८, २०२२ शनिबारको राती ज्यान गएको छ । निरन्तर रक्तस्राव नरोकिएको कारण उनको मृत्यु भएको अस्पतालले पारिवारिक स्रोतलाई जानकारी गराएको बुझिएको छ ।
सुत्केरी भएपश्चात नै निरन्तर रक्तस्राव हुने गरेको र स्थानीय अस्पतालमा उपचार गराइरहेको उनको स्वास्थ्य अवस्था असामान्य बनेपछि गुन्मा युनिभर्सिटी हस्पिटल लगिएको र शल्यक्रियाको क्रममा सबिनाको ज्यान गए पनि बच्चा (छोरी) को स्वास्थ्य अवस्था सामान्य रहेको नेपाली साझा समाज जापानका अध्यक्षसमेत रहेका समाजसेवी बुद्धि शेरचनले जानकारी गराए ।
‘नेपालमा आमा र बहिनीको प्रतिक्षामा रहेका ११ वर्षीय छोरासहितले सबिनाको जीवित मुहार हेर्न नपाए पनि शवलाई नेपाल लैजाने आवश्यक तयारीमा छौँ’ पति युवराजले आइतबार गुन्माकेन इसेसाकी सिटी शव व्यवस्थान गृहमा राखिएको पत्नीको अन्तिम श्रद्धाञ्जली अर्पण कार्यक्रममा भावविहल हुँदै भने– ‘विदेशमा यस्तो दुर्भाग्य कसैलाई नपरोस्, जहा आमाको मुहार चिन्न नपाउँदै छोरी टुहुरी भइन् । पाँच वर्षदेखि आमा पर्खिएको छोराले आमाको मात्र शव देख्नुपर्ने भयो ।’
सबिनाको अन्तिम श्रद्धाञ्जली अर्पण गर्नका लागि गुन्मा क्षेत्रमा रहेका करिब १०० जना नेपालीको उपस्थिति रहेको थियो । उपस्थित सबैका आँखा रसाएका थिए भने नवजात शिशु र परिवारको अवस्था सम्झेर धेरै भक्कानिए थिए ।
सबिनाको शवलाई नेपाल लैजानका लागि आवश्यक कानुनी प्रक्रिया अघि बढाइएको र शुभचिन्तकहरूबाट सामान्य रूपमा आर्थिक सङ्कलनसमेत गरिएको समाजका अध्यक्ष शेरचनले जानकारी दिए ।
