रिष्मेली मेघराज, टोकियो (जापान) ##
जापानको ओसाकामा रहेको नौमती बाजा समूह जापानले २०७९ साल बडादसैँको अवसर पारेर शुभकामना आदानप्रदान तथा साङ्गीतिक कार्यक्रम सम्पन्न गरेको छ ।
बाजा समूहको आयोजनामा अगस्ट ३, २०२२ सोमबारका दिन सिनओसाकास्थित कोको प्लाजा हलमा उक्त कार्यक्रम सम्पन्न भएको हो ।
“कला संस्कृतिको संरक्षण एवम् सम्बद्र्धन, कलाकारहरूलाई हौसला र सम्मान” मूल उद्देश्यसहित नेपालीहरूको महान् पर्व बडादसैँ तथा तिहारको अवसर पारेर उक्त कार्यक्रमको आयोजना गरिएको थियो ।
कार्यक्रममा नौमती बाजा समूह ओसाका जापानका संस्थापक अध्यक्ष यामलाल सापकोटाको प्रमुख आतिथ्य तथा एनआरएनएका पूर्व आई.सी.सी. सदस्य एवम् जापानका सल्लाहकार तुल्सीराम खरेलको विशिष्ट आतिथ्य रहेको उक्त कार्यक्रममा जापान नेपाली एकता समाजका महासचिव तेजेन्द्र क्षेत्री, संस्थाका संरक्षक नन्दु शर्मा, एनआरएनए कान्साईका सहसचिव लक्ष्मण गैरे, गल्कोट समाज कान्साईका कोषाध्यक्ष बिपिन सापकोटा, जनसम्पर्क समिति जापानका सहमहामन्त्री एवम् नवलपुर समाज जापानका केन्द्रीय उपाध्यक्ष हरि कँडेल, ओसाका ब्रदर गु्रपका संयोजक सबिन गौचन, बोहोराफाँट समाजका जुने बोहोरा, समाजसेवी राजु केसी, पशुपति सापकोटाको उपस्थिति रहेको थियो ।
सो अवसरमा लोकदोहोरी गीत प्रतिष्ठान जापान शाखाका आजीवन सदस्य दुर्गेश कार्की, लोकदोदोरी गायक दिनेश केसी र गायक छवि घिमिरे, नृत्यकार करिष्मा थापा, भावना सापकोटा, सिर्जन सापकोटा, आकृति सापकोटा केसीको समेत उपस्थित रहेको थियो ।
प्रमुख अतिथि, विशिष्ट अतिथिर कार्यक्रमका अध्यक्ष एवम् समूहका अध्यक्षले संयुक्त रूपमा रिबन काटेर कार्यक्रमको उद्घाटन गर्नुभएको थियो भने बाजा समूहले मङ्गलधुन बजाएको थियो ।
कार्यक्रममा विशिष्ट अतिथि तुल्सीराम खरेल र समूहका उपाध्यक्ष यमलाल सापकोटाले शुभकामना मन्तव्य राख्नुभएको थियो ।
भावना सापकोटा, सिर्जन सापकोटा, करिष्मा थापा र आकृति केसी सापकोटाले दसैँसम्बन्धी गीतमा नृत्य प्रस्तुत गर्नुभएको सो कार्यक्रममा गायक दुर्गेश कार्की, दिनेश केसी र छवि घिमिरेले गीत प्रस्तुत गरेर हलमा रहेका दर्शकलाई मनोरञ्जनका साथै हल गुन्जायमान गराएका थिए । औपचारिक कार्यक्रमपश्चात नौमती बाजा समूह ओसाका जापानले नौमती बाजा बजाएपछि उपस्थित दर्शकहरू नाचेका थिए ।
कार्यक्रम नौमती बाजा समूहका अध्यक्ष गोपाल खत्रीको अध्यक्षता, समूहका सदस्य भुवन सापकोटा (भेषराज) को स्वागत मन्तव्य र सदस्य रेशम केसी सापकोटाको सञ्चालनमा सम्पन्न भएको थियो ।
कार्यक्रममा जापानको कान्साई र टोकियोबाट गरेर सयौँ नेपालीको उपस्थित रहेको थियो ।
