सभामुख चयन गर्न सत्तारुढ नेपाल कम्युनिष्ट पार्टी (नेकपा) को बिहीबार बसेको सचिवालय बैठकले पनि सभामुख चयन गर्न सकेन । अध्यक्षद्वय केपी ओली र पुष्पकमल दाहाल ‘प्रचण्ड’ बीच सभामुखमा कुरा नमिल्दा संसद बन्धक बन्दै आएको छ ।
सभामुख चयन गर्न बसेको सचिवालय बैठकमा साँझ साढे ८ बजेसम्म पनि सहमति नभएपछि भोलि बिहान साढे ८ बजे पुनः बस्ने गरी स्थगित गरिएको छ ।
नेकपाभित्र सभामुखको विषयमा सहमति जुट्न नसक्दा संसद बैठक पुस २७ गतेसम्मका लागि स्थगित गरिएको छ । तीन महिनादेखि रिक्त रहेको सभामुख पदमा सुवास नेम्वाङ र अग्नी सापकोटामध्ये कसलाई पठाउने भन्ने विषयमा अध्यक्षद्वय केपी शर्मा ओली र प्रचण्डबीच सहमति जुट्न सकेको छैन ।
प्रधानमन्त्री केपी ओली सुवास नेम्वाङलाई सभामुख बनाउने पक्षमा छन् भने प्रचण्ड पूर्व एमालेलाई सभामुख दिन तयार छैनन् । उनले अग्नी सापकोटालाई अगाडि सारेका छन् ।
तत्कालिन सभामुख कृष्णबहादुर महरा बलात्कार प्रयासको आरोप लागेपछि अहिले जेलमा छन् । उनी पूर्व माओवादी समूहबाट सभामुख भएकोले अहिले पनि सो पद आफूहरुले नै नै पाउनुपर्ने पूर्व माओवादी पक्षको अडान छ ।
