काठमाडौँ । नालापानीको इतिहासमाथि फिल्म निर्माण भएको छ । सन् १८१४ मा देहरादुनस्थित नालापानी गढीमा भएको अङ्ग्रेज–नेपाल युद्धमा नेपाली फौजका तर्फबाट कप्तानी गर्नुभएका वीर बलभद्र कुँवरको लडाइँमा आधारित रहेर फिल्म “नालापानी” निर्माण गरिएकोहो ।
निर्मातासमेत रहनुभएका रिमेश अधिकारीले नेपाली वीरताको गाथालाई पर्दामा ल्याउनु सहज नरहेको बताउनुभयो ।
‘नालापानी गढीमा अङ्ग्रेज सैनिक विरुद्ध नेपाली फौजले लडेको साहसिक लडाइँलाई अहिलेको पुस्तालाई देखाउनु र बुझाउनु मेरो उद्देश्य हो । हामीले आफ्नो वीरताको गाथालाई सङ्गृहित गर्नु जरुरी छ’ उहाँले भन्नुभयो ।
युद्धको समयको भोगाइलाई पर्दामा देखाउनु कठिन रहेको निर्देशक अधिकारीले सुनाउनुभयो । ‘सीमित प्रविधि, बजारले गर्दा हाम्रो मेकिङमा असर गर्छ । यद्यपि हामीले सक्दो मिहिनेत गरेका छौँ’ उहाँले भन्नुभयो ।
उहाँले झन्डै नौ वर्ष लगाएर फिल्म तयार गर्नुभएको हो । चलचित्र विकास बोर्डले दुई वर्षअगाडि विशेष फिल्मसमेत घोषणा गरेको थियो ।
लेखन तथा अनुसन्धानमा निर्देशक अधिकारीलाई कृष्ण आचार्यले सहयोग गर्नुभएको हो । प्राडा धनराज कुँवर र रामराजा कुँवरद्वारा लिखित “नालापानीका नायक वीर बलभद्र” पुस्तकमा आधारित रहेर इतिहासविद्हरू प्राडा धनराज कुँवर, प्राडा त्रिरत्न मानन्धर, प्रा दिनेशराज पन्त, प्राडा सुरेन्द्र केसी, पूर्वसहायक रथि डा प्रेमसिंह बस्न्यातहरूसँग छलफल गरेर नेपाली सेनाले प्रकाशित गरेको पुस्तक “सैनिक इतिहास” मा आधारित रहेर “नालापानी” तयार पारिएको हो ।
फिल्ममा देशभक्त खनाल, अर्जुनजङ्ग शाही, सन्तोष पन्त, मनोज शाक्य, विशाल पहारी, विजय विष्फोट, पुजना प्रधान, गीता अधिकारी, महावीर विश्वकर्मा, इशानबिजु श्रेष्ठ, हिक्मत थपलिया, सारिता राजोपाध्याय, लक्ष्मी नाथ, गायत्री घिमिरे, जनक बर्तौला, विशाल श्रेष्ठ, सहिना भट्टराई, गीत विष्ट, युगजङ्ग कार्की, सिमन खड्का, सुशील खड्का (डेभिड), बाल कलाकार तेजस्वी गुरुङ, हार्दिक थपलिया, प्रनिस शाक्य, निर्माण थपलिया साथै विदेशी कलाकार एन्ड्रोइन डङ्कन, रेचल मोलेस, पल विकिन्सन र सामलगायतको अभिनय छ ।
