काठमाडौं । दूरसञ्चार सेवाप्रदायक कम्पनी एनसेलले बक्यौता रहेको पुँजीगत लाभकरमध्ये साढे चार अर्ब बुझाएको छ । मंगलबार एनसेलले ठूला करदाता कार्यालयलाई बक्यौता रकममध्ये ४ अर्ब ५० करोड रकम बुझाएको हो । एनसेलले उक्त रकम एभरेष्ट बैंकमार्फत बुझाएको हो । उक्त रकम बुझाएसँगै अब एनसेलले १७ अर्ब ९४ करोड बुझाउन बाँकी छ ।
कार्यालयले सर्वोच्च अदालतको आदेशअनुसार एनसेलको सेयर स्वामित्व खरिद बिक्रीवापतको लाभकर २२ अर्ब ४४ करोड ५३ लाख रुपैयाँ निर्धारण गरेको छ । गत मंसिर २० मै कार्यालयले उक्त रकम निर्धारणपछि तिर्नको लागि १५ दिनको समय दिएको थियो तर एनसेलले उक्त म्याद गुजारेपछि पुस ६ गते पुनः १५ दिने म्यादसहितको पत्र एनसेललाइ पठाएको थियो ।
ठूला करदाताको कार्यालयले एनसेललाई सर्वोच्चले यससम्बन्धी मुद्दामा गरेको आदेशको पूर्णपाठमा भएबमोजिमको बक्यौता कर तथा त्यसमा जरिवाना समेत गरी उक्त रकम तिर्न एनसेललाइ भनेको छ । गत भदौमा गरेको फैसलाको पूर्णपाठ सार्वजनिक गर्दै सर्वोच्च अदालतले गत मंसिर ५ गते एनसेलसँग २१ अर्ब १० करोड रुपैयाँ कर असुली गर्नुपर्ने फैसला सुनाएको थियो ।
आयकर ऐनको प्रक्रियाअनुसार बक्यौता एकीन गरी ठूला करदाता कार्यालयले ताकेता गरेको हो। दुई पटकसम्म समयसीमा दिनुपर्ने कानुनी व्यवस्थाअनुसार पुनः १५ दिनको समय दिइएको थियो । यो समयसीमा समेत नाघेमा कानुनअनुसार कारबाहीको तयारी कार्यालयले गरे पनि एनसेलले बक्यौता बुझाउन सुरू गरेको छ ।
