शंकर प्रसाद पोख्रेल, बुटवल ।
राष्ट्रिय जनमोर्चाका अध्यक्ष चित्र बहादुर केसीले रक्तिम सांस्कृतिक अभियानका कलाकारलाई ‘क्रान्तिको झिल्को’ बन्न आह्वान गर्नुभएको छ ।

बुटवलमा आज (सोमबार)देखि सुरु भएको रक्तिम सांस्कृतिक अभियानको पाँच दिने प्रशिक्षण कार्यक्रमको उद्घाटन गर्दै यस्तो बताउनुभएको हो ।

अध्यक्ष केसीले पश्चिमी छाडा संस्कृतिको विरुद्धको भ्रम चिर्न जनवादी संस्कृतिको उदय भएको बताउँदै रक्तिमका कलाकारहरुलाई क्रान्तिको झिल्को भएर फेरि देशमा उदाउन आग्रह गर्नुभयो ।

प्रशिक्षण भेलालाई सम्बोधन गर्दै अध्यक्ष केसीले देशको राजनीति अत्यन्तै जटिल मोडमा उभिएको बताउनुभयो । उहाँले अहिले देशमा भैरहेको प्रतिगमन एक्लै नआएको बताउँदै पहिले राजाले गरेको प्रतिगमनमा राजा एकलैले गरेको तर अहिलेको प्रतिगमनमा राजावादी, भारत, ओलीको साथ रहेको उल्लेख गर्नुभयो ।

नेता केसीले देशमा प्राप्त उपलब्धिहरुको रक्षा गर्दै त्यसैको जगमा टेकेर जनवादी क्रान्तिको दिशामा अगाडि बढ्नुपर्ने बताउनुभयो ।

उहाँले सम्मानजनक तालमेल भएमा मात्र पाँचदलीय गठबन्धन अगाडि बढ्न सक्ने बताउँदै अहिलेको प्रतिगामीहरुलाई परास्त गर्न चुनावमा मिलेर जान आवश्यक रहेको बताउनुभयो । साथै उहाँले राष्ट्रिय जनमोर्चाले सम्मानजनक हैसियत नपाए एक्लै चुनाव लड्ने स्पष्ट पार्नुभयो ।

कार्यक्रममा नेकपा (मसाल) का प्रवक्ता रामप्रकाश पुरी, राष्ट्रिय जनमोर्चाका उपाध्यक्ष जनकराज शर्मा, राजमो नेता सुरेश थापा, अखिल (छैठौं) का केन्द्रीय सदस्य सागर बेलबासे लगायतले शुभकामना मन्तव्य दिनुभएको थियो ।

त्यस्तै, राजमो केन्द्रीय कोषाध्यक्ष मधु क्षेत्री, मूल प्रवाह अखिल भारत नेपाली एकता समाजका उपाध्यक्ष प्रेम पौडेल, अखिल (छैठौं) का केन्द्रीय सदस्य सागर बेलबासे, र रिसव आचार्य, प्रगतिशील पत्रकार संघका केन्द्रीय सदस्य शंकर प्रसाद पोख्रेल, राजमो केन्द्रीय सदस्य देवि शर्मा, रक्तिम कलाकारहरु मेस्मा पुन, उषा तरामी मगर, हरि ज्ञावली लगायतको आतिथ्यता रहेको थियो।

रक्तिम सांस्कृतिक अभियानका अध्यक्ष गिरीप्रसाद बुढाको अध्यक्षता तथा केन्द्रीय उपाध्यक्ष हेमराज आश्रमको सञ्चालनमा अघि बढेको कार्यक्रममा सचिव मोहराज शर्माले स्वागत गर्नुभएको थियो ।

कार्यक्रममा विभिन्न जिल्लाबाट आएका कलाकारहरुले जनवादी गीत तथा नृत्य प्रस्तुत गरेका थिए ।

‘सामन्ती तथा साम्राज्यवादी संस्कृतिको विरुद्ध जनवादी संस्कृतिको झण्डा उठाऔँ’ भन्ने मूल नाराका साथ सञ्चालित प्रशिक्षण कार्यक्रम १४ गते समापन हुने छ।