काठमाडौं । साहित्यकार तथा प्रगतिशील लेखक कलाकार संघका पूर्वअध्यक्ष रघुजी पन्तले नेपालका परम्परा, संस्कृति तथा चाडपर्वहरुको मौलिकताको रक्षा गर्दै यसलाई वैज्ञानिक रुप दिनुपर्ने बताउनुभएको छ ।
प्रलेसको आयोजनामा शुक्रबार सम्पन्न ५८औं परिसम्वाद कार्यक्रममा पन्तले सो धारणा राख्नुभएको हो ।
‘प्रगतिशील दृष्टिमा हाम्रा चाडपर्वहरू’ विषयक परिसम्वाद कार्यक्रममा साहित्यकार पन्तले ‘हिन्दू धर्म भित्रका जातीय विसंगतिलगायतका विकृतिहरुलाई समाधान नगर्ने हो भने इसाइकरणको प्रक्रियालाई रोक्न नसकिने’ बताउनु भयो ।
उहाँले नेपालमा आदिवासी कोही पनि नभएको बताउँदै, ‘शेर्पाहरु नेपाल आएको ५०० वर्ष भयो तर बाहुन क्षेत्रीहरु १७०० वर्षअघिदेखि काठमाडौंमा बस्दै आएका तथ्यहरु छन् । अनि बाहुन क्षेत्री आदिवासी नहुने तर शेर्पाहरु कसरी आदिवासी हुन्छन् ?’ भनि प्रश्न गर्नुभयो ।
तामाङहरुको नयाँ वर्ष तिब्बतीय संस्कृति भएको, दूर्गा पूजाको संस्कृति पश्चिम बंगालको संस्कृति भएको उदाहरण दिँदै उहाँले नेपालमा सांस्कृतिक अतिक्रमण बढ्दै गैरहेको बताउनुभयो । साथै प्रकृतिसँग जोडिएका संस्कृतिहरुलाई वैज्ञानिकरण गर्दै जानुपर्नेधारणा राख्नुभयो ।
प्रलेसका अध्यक्ष डा.मधुसूदन गिरीको अध्यक्षता, महासचिव डा.देवी दुलाल क्षेत्रीको सञ्चालनमा अगाडि बढेको परिसम्वाद कार्यक्रममा संघका उपाध्यक्ष तथा परिसम्वाद कार्यक्रमका संयोजक समीर सिंहले विषयवस्तुमाथि प्रष्ट पार्नुभएको थियो ।
परिसम्वाद कार्यक्रममा आरसी न्यौपाने, डा.धनप्रसाद सुवेदी, लोकबहादुर थापा, तेजविलास अधिकारी, डा.कौशिला रिसाल, रामचन्द्र खतिवडा, इश्वरी शर्मा लगायतले पुरक टिप्पणी गर्नुभएको थियो ।
