काठमाडौं । युरोपेली संघको एक संसदीय प्रतिनिधिमण्डल बिहीबार नेपाल आएको छ । अष्ट्रियाकी राजनीतिज्ञ युरोपेली संसदकी उपाध्यक्ष इभलिन रेग्नरको नेतृत्वमा चार सदस्यीय टोली नेपाल भ्रमणमा आएको हो ।
टोलीमा रेग्नर, उलरिक मुलर (जर्मनी), टमस ज्डेचोभ्स्की (चेक रिपब्लिक) र म्याक्सिमिलियन क्र (जर्मनी) रहेका छन् ।
नेपालमा नयाँ संविधान जारी भएपछि संघीय लोकतान्त्रिक प्रणाली कार्यान्वयनमा भइरहेका काम जानकारी लिन युरोपेली संसदीय प्रतिनिधिमण्डल आएको नेपालस्थित युरोपेली प्रतिनिधिमण्डलको कार्यालयले एक प्रेस विज्ञप्तिमा जनाएको छ ।
त्यसैगरी भ्रमणले नेपाल र युरोपेली युनियनबीच रहीआएको सहकार्य विस्तार गर्न भावी दिनमा सहकार्य अभिबृद्धी गर्न योगदान गर्ने कार्यालयले उल्लेख गरको छ।
नेपालको राजनीतिक परिस्थितीबारे पनि युरोपेली युनियनले चासो दिँदै आएको छ । नेपाल संघीय र प्रादेशिक चुनावको मुखमै रहेका बेला युरोपेली संसदको टोली संघीयता कार्यान्वयनको अवस्था बुझ्न यहाँ आउन लागेको हो ।
नेपालमा रहँदा युरोपेली सांसदले प्रमुख राजनीतिक दलका नेता, संघीय सरकारका मन्त्रीहरु, नागरिक समाजका प्रतिनिधि, महिला नेतृत्वहरु र पत्रकारसँग अन्तरक्रिया गर्ने कार्यक्रम रहेको युरोपेली प्रतिनिधिमण्डलको कार्यालयले जनाएको छ ।
माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल प्रचण्ड, पूर्वपरराष्ट्रमन्त्री तथा एमालेका उपमहासचिव प्रदीप कुमार ज्ञवाली र पूर्वस्वास्थ्यमन्त्री एवं नेपाली कांग्रेसका महामन्त्री, सांसद गगन थापासँग भिन्दा भिन्दै भेटवार्ता गर्नेछन् ।
त्यसैगरी परराष्ट्रमन्त्री नारायण खड्का, वाणिज्यमन्त्री दिलेन्द्र प्रसाद बडु र प्रमुख निर्वाचन आयुक्त दिनेश कुमार थपलियासँग पनि भेट्नेछन् ।
यहाँ रहँदा जलवायु परिवर्तन, लैंगिक सवाल र सामाजिक समावेशिताबारे युरोपेली टोलीले छलफल गर्ने प्रतिनिधिमण्डलको कार्यालयले जनाएको छ ।
अमेरिका र चीनका तर्फबाट नेपालमा भइरहेका तारन्तारका भ्रमणबीच युरोपेली मुलुकले पनि यहाँको आन्तरिक राजनीति र भूराजनीतिलाई चासोका साथ नियालिरहेको देखिन्छ।
चीनको प्रत्यक्ष राजनीतिक र सुरक्षा स्वार्थ जोडिएका तिब्बत र ताइवानका मामिलामा अमेरिका र युरोपेली मुलुक एकठाउँमा उभिने गरेका छन् ।
