काठमाडौं । नेकपा (मसाल) का प्रवक्ता एवम् प्रगतिवादी साहित्यकार रामप्रकाश पुरी ‘प्रलेस प्रतिभा पुरस्कार’ बाट सम्मानित हुनुभएको छ ।
प्रगतिशील लेखक संघको ७१ औँ स्थापना दिवसका अवसरमा बुधबार काठमाडौंमा आयोजित कार्यक्रममा पुरीलाई सो सम्मान प्रदान गरिएको हो । वरिष्ठ साहित्यकार मोदनाथ प्रश्रित र गंगाप्रसाद उप्रेतिले पुरीलाई सम्मान पत्रसहित २० हजार १०० रुपैयाँ राशिको पुरस्कार प्रदान गर्नुभयो ।
यस्तै, रु २५ हजार १०० राशिको ‘प्रलेस श्याम प्रसाद पुरस्कार’ पदम प्रसाद शर्मा, (दाङ), १० हजार १०० राशिको ‘प्रलेस मित्र बालसाहित्य पुरस्कार’ शशिकिरण रेग्मी (रह शर्मा) (चितवन) र सोही राशिको ‘प्रलेस युवा पुरस्कार’ राजेन्द्र तारकिणी, (बैतडी) लाई प्रदान गरियो ।
पुरस्कृत व्यक्तित्वमाथि प्रलेसका पुर्वमहासचिव एवम् पुरस्कार छनोट समितिका अध्यक्ष समीर सिंहले चर्चा गर्नुभएको थियो ।
प्रलेस स्थापना दिवसको अवसर पारेर प्रलेस वेवसाइट पनि सुरुवात गरिएको छ भने प्रलेस सम्मेलन विशेषांक विमोचन गरिएको छ ।
कार्यक्रममा डा. धनप्रसाद सुवेदी, प्राडा जीवेन्द्र देव गिरी, डा. पुस्कर राज भट्ट, मधु क्षेत्री, प्रेमनान खत्री, शान्ता मानवी लगाएतले मन्तव्य राख्नुभएको थियो ।
डा. मधुसूदन गिरीको अध्यक्षता र डा. देवि दुलाल क्षेत्रीको सञ्चालनमा अघि बढेको कार्यक्रममा बालमुकुन्द कार्कीले स्वागत गर्नुभएको थियो ।
