काठमाडौं । उखु किसानहरुको समस्यप्रति सरकार बेखबर बनेको भन्दै अखिल नेपाल किसान महासंघले आक्रोश व्यक्त गरेको छ । महासंघका अध्यक्ष भैरवराज रेग्मीले सरकारले तत्काल पहल गरेर उनीहरुका समस्या समाधान गर्नुपर्ने बताउनुभयो ।
चिनी मिलहरुले ७ वर्षदेखि भूक्तानी नदिएपछि सर्लाहीका उखु किसानहरु काठमाडौं आएका छन् । आफ्नो पिडा सरकारलाई सुनाउन राजधानी छिरेका उनीहरु लगातार एक हप्तादेखि माइतीघरमण्डलामा धर्ना दिइरहेका छन् । तर, सरकारले उनीहरुको कुरा सुनेको छैन ।
चिनी मिलहरुले विगत ७ वर्षदेखि उखुको भुक्तानी नगरेको भन्दै उनीहरु धर्नामा बसेका हुन् । किसानहरुले उखुको मूल्य पनि सरकारले तोकेअनुसार कार्यान्वयन हुनुपर्ने बताउँदै आएका छन्। मिलहरुले अहिले आफुखुसी ५ सय रुपैयाँ दिँदै आएकोमा सरकारले निर्धारण गरेको ५३६/५६ प्रतिक्विन्टल कायम गर्नुपर्ने माग किसानहरुको छ।
महासंघका अध्यक्ष रेग्मीले किसानको भुक्तानी वर्षौंदेखि रोक्ने चिनीमिल र तिनका मालिकहरुलाई कारबाही गर्नसमेत माग गर्नुभएको छ । युगदर्शनसँग कुरा गर्दै अध्यक्ष रेग्मीले भन्नुभयो, ‘चिनी मिल र पुँजिपपतिहरुका कारण किसानहरु रोइरहेका छन् । तर, सरकारले वेवास्ता गरेको छ । तत्काल किसानका समस्या सम्बोधन गरी उखुको रकम भुक्तानी दिलाउन र चिनी मिलहरुलाई कारबाही गर्न सरकारले तत्परता देखाओस् ।’
भुक्तानी नदिएसम्म उखु नकाट्ने र मिलहरु कुनै पनि हालतमा चल्न समेत नदिने किसानहरुले चेतावनी दिएका छन्। किसानहरुको उक्त आन्दोलनप्रति अखिल नेपाल किसान महासंघले ऐक्यवद्धता जनाएको छ ।
अध्यक्ष रेग्मीले किसानहरुको आन्दोलनप्रति ऐक्यवद्धता प्रकट गर्दै अखिल नेपाल किसान संघले पनि छिट्टै आन्दोलनको घोषणा गर्ने बताउनुभयो । उहाँले किसानहरुका विभिन्न समस्यालाई उठान गर्नेगरी महासंघले ‘तराई मधेश किसान मार्च’ गर्न लागेको जानकारी पनि दिनुभयो ।
