काठमाडौं । काठमाडौंमा जारी छैटौं संस्करणको महिला साफ च्याम्पियनसिप फुटबलमा नेपालले पाहुना टोली श्रीलंकालाई सोमवार ६–० को फराकिलो अन्तरले हराउँदै सेमिफाइनलमा स्थान बनाएको छ ।
त्रिपुरेश्वर स्थित दशरथ रंगशालामा सम्पन्न समूह बी अन्तर्गतको अन्तिम खेलमा नेपालले श्रीलंकामाथि फराकिलो जित निकाल्दै अन्तिम चारमा स्थान पक्का गरेको हो । यससँगै नेपाल समूह विजेतको रुपमा अन्तिम चारमा प्रवेश गरेको छ ।
नियमित खेलाडी सावित्रा भण्डारी डेंगुका कारण अनुपस्थित भएपनि नेपाल श्रीलंकामाथि हावी रह्यो । नेपाललाई जित दिलाउन यसै प्रतियोगितामा डेब्यु गरेकी अमिषा कार्कीले दुई गोल गर्दा रश्मी कुमारी घिसिङ, सरु लिम्बू, अमृता जैशी र दिपा शाहीले एक÷एक गोल गरे ।
पहिलो हाफमा चार गोल गरेको नेपाल दोस्रो हाफमा दुई गोल थपेको थियो । दोस्रो हाफमा मैदान प्रवेश गरेकी अमिशाले दुवै गोल गरेकी हुन् । खेलको नवौं मिनेटमा रश्मीले गोल गर्दै नेपाललाई सुरुआती अग्रता दिलाएकी थिइन् ।
त्यसको दुई मिनेटपछि सरुले गोल गर्दै नेपाललाई २–० को अग्रता दिलाउँदा १७ औं मिनेटमा अमृताले गोल गर्दा नेपाल ३–० को अग्रता पाएको थियो । पहिलो हाफको इन्जुरी समयमा दिपाले गोल गरेपछि नेपालले पहिलो हाफमा ४–० को अग्रता बनायो ।
दोस्रो हाफमा केही रक्षात्मक देखिएको श्रीलंकाबिरुद्ध पाँचौ गोल गर्न ७६ औं मिनेट कुर्नुपर्यो । भुटानबिरुद्धको खेलमा डेब्यु गरेकी अमिषाले गोल गर्दै नेपाललाई ५–० को अग्रता दिलाईन् ।
अमिषाले नेपालको लागि यो पहिलो गोल गर्न पनि सफल भएकी हुन् । त्यसपछि खेलको इन्जुरी समयमा अमिषा व्यक्तिगत दोस्रो गोल गर्दै नेपाललाई ६–० को सहज जित दिलाउँदै सेमिफाइनलमा स्थान पक्का गराइन् ।
हारसँगै श्रीलंका प्रतियोगिताबाट बाहिरिएको छ । तालिकाको पुछारमा अंक बिहीन हुँदै श्रीलंका घर फर्किएको छ ।
लगातारका दुई खेलमा स्पष्ट जित निकालेको नेपालले ६ अंक जोड्दा समूह बी तालिकाको शीर्ष स्थानमा रह्यो भने भुटान दोस्रो स्थानमा रह्यो । भुटान यसअघि नै अन्तिम चारमा प्रवेश गरेको थियो । भुटान समूह उपविजेता बन्दै अन्तिम चारमा पुगेको छ ।
पहिलो खेलमा श्रीलंकालाई भुटानले ५–० गोल अन्तरले हराएको थियो । नेपालसँग भुटान ४–० गोलले पराजित भएको थियो ।
उता समूह ए बाट भारत र बंगलादेशले अन्तिम चारमा स्थान पक्का गरिसकेको छ । मंगलवार हुने दिनको दोस्रो खेलपछि समूह विजेताको टुङ्गो लाग्नेछ । माल्दिभ्स र पाकिस्तान भने बाहिरिसकेका छन् । दुवै टोलीबीच मंगलवार प्रतिष्पर्धा हुनेछ् ।
