काठमाडौं । मूल प्रवाह अखिल भारत नेपाली एकता समाजका तत्कालिन नेता पिनु थापा मगर मूल घरमै फर्किनुभएको छ ।
करिब १६ वर्षअघि (सन् २००६) मा पार्टीभित्रको अन्तरसंघर्षका क्रममा संगठन छोडेका थापा आत्माआलोचना गर्दै मूल घरमै फर्कनुभएको हो ।
थापाले शुक्रबार एक विज्ञप्ति प्रकाशित गरी ‘वर्तमान राजनीति परिवेशमा नेकपा (मसाल) ले खेलेको भूमिका र पार्टीको राजनीतिक लाइन बुझदा यहि पार्टी नै देशको राष्ट्रियता, जनतन्त्र, जनजिवीकाको रक्षा गर्नुको साथै क्रान्तिकारी राजनीतिक लाइनलाई जोगाइ राख्न सक्छ’ भन्ने महसुस गरेको बताउनुभएको छ ।
साथै उहाँले पार्टीको राजनीतिक लाइनलाई बुझ्दा विगतमा पार्टी परित्याग गर्नु कमजोरी भएको पनि स्वीकार गर्नूभएको छ ।
यस्तो छ पिनु थापाको विज्ञप्ति
म पिनु थापा मगर कोहलपुर नपा १०, बाँके निवासी सन १९९१ देखि मूल प्रवाह अखिल भारत नेपाली एकता समाज (तात्कालिन अखिल भारत नेपाली एकता समाज) मा संगठित भई नेकपा (मसाल) को जनवर्गीय संगठनका विभिन्न जिम्मेवारीहरुमा रहँदै पेशेवर कार्यकर्ताको रुपमा समेत परिचालित भएको थिएँ ।
सन् २००६ तिर तात्कालिन नेकपा (एकता केन्द्र–मसाल) भित्रको अन्तरसंघर्षबीच पार्टी एकताको नाममा जन्मिएको तेस्रो धारका केही साथीहरुले पार्टीमा विभाजन गर्न पुगे । म पनि भ्रमबस उनीहरुसँगै समाहित भएको थिएँ । तर तात्कालिन तेस्रो धारका साथीहरुको गतिविधिले पार्टीलाई मजबुत बनाउने भन्दा पनि कमजोर बनाउने काम गरे । उनीहरुबाट नेपाली क्रान्तिको प्रतिनिधित्व गर्न सक्ने सम्भावना नदेखेपछि लामो समयदेखि निष्कृय तथा कुनै दलसँग आवद्ध नभई स्वतन्त्र रुपमा बसेको थिएँ ।
वर्तमान राजनीति परिवेशमा नेकपा (मसाल) ले खेलेको भूमिका र पार्टीको राजनीतिक लाइन बुझ्दा यही पार्टी नै देशको राष्ट्रियता, जनतन्त्र, जनजीविकाको रक्षा गर्नुको साथै क्रान्तिकारी राजनीतिक लाइनलाई जोगाइ राख्न सक्छ । पार्टीको राजनीतिक लाइनलाई बुझ्दा विगतमा पार्टी परित्याग गर्नु कमजोरी भएको आत्मालोचना गर्दै पुनः नेकपा (मसाल) को भारत प्रवास मोर्चा एवम् आफ्नै पुरानो घरमा आजैको मिति (९ सितम्बर २०२२, तदानुसार २०७९ भदौ २४ गते) देखि मूल प्रवाह अखिल भारत नेपाली एकता समाजमा प्रवेश गरेको घोषणा गर्दछु ।
पिनु थापा मगर (९ सितम्बर २०२२)
