मेघराज रिष्मेली, जापान ।
जापान नेपाली एकता समाज क्षेत्रीय समिति ओसाका र ह्योगोकोद्वारा नेपाली महिलाहरूको महान पर्व हरितालिका तीज को अवसर पारेर संयुक्त कार्यक्रम सम्पन्न भएको छ । सोमबार (अगष्ट २९) का दिन तीजको शुभकामना आदान प्रदान तथा दर खाने कार्यक्रम गरिएको हो ।
ओसाकास्थित मिलन रेष्टुरेण्ट सुमिनोदोको हलमा भएको कार्यक्रममा रक्तिम सांस्कृतिक अभियानका सचिव टिका केसीले एकल गीत प्रस्तुत गर्नुभएको थियो । यस्तै, महिला दिदीबहिनीहरूले मौलिक संस्कृति झल्किने तीज गीत र नृत्य प्रस्तुत गरेका थिए ।
कार्यक्रममा मन्तव्य राख्दै एकता समाजका महासचिव तेजेन्द्र क्षेत्रीले जापान नेपाली एकता समाजले भड्किलो, खर्चिलो र उत्ताउलो किसिमका कार्यक्रमको सदैव विरोध गर्ने उल्लेख गर्दै प्रगतिशील गीत, नाच र कार्यक्रमलाई सधैँ अंगाल्नु पर्नेमा जोड दिनुभएको थियो ।
कार्यक्रममा एकता समाजका केन्द्रीय सदस्य गोपाल सापकोटा (गोविन्द)को प्रमुख आथित्यता तथा महासचिव तेजेन्द्र क्षेत्रीको विशिष्ट आथित्यता रहेको थियो ।
यसैगरी युगदर्शन संवाददाता मेघराज सापकोटा, एकता समाजका वरिष्ठ सल्लाहकार नन्दु शर्मा, रक्तिम अभियान जापानका केन्द्रीय सचिव टिका केसी दिपक, तुलसी खरेल, ईन्दिरा क्षेत्रीको पनि आतिथ्यता रहेको थियो ।
जापान नेपाली एकता समाज क्षेत्रीय समिती ह्योगोका अध्यक्ष भेषराज सापकोटा (भुवन) को अध्यक्षता, महिला नेत्री तुलसी खरेलको स्वागत र एकता समाजका क्षेत्रीय समिति ओसाकाका सचिव गोपालकृष्ण सापकोटाको सञ्चालनमा कार्यक्रम सम्पन्न भएको थियो ।
कार्यक्रममा उपस्थित सम्पूर्ण दिदीबहिनी दाजुभाइलाई क्षेत्रीय समिति ओसाका र ह्योगोले संयुक्त रूपमा धन्यवाद ज्ञापन गरेका थिए ।
