काठमाडौँ । सउदी अरब नेपाली एकता समाजले दाङ तुलसीपुर घर भएका एक जना युवकको शव नेपाल पठाएको छ ।
साउन १६ गते सउदी अरबका जिद्दास्थित कम्पनीमा निधन भएका दाङ तुलसीपुर दुधियानाका ४० वर्षीय रेसमबहादुर बुढाथोकीको शवलाई अध्यक्ष राजकुमार धितालको पहलकदमीमा समाजले नेपाल पठाएको हो ।
भदौ ८ गते नेपाल आइपुगेको रेशमबहादुरको शव दाङ लगेर भदौ १० गते दाहसंस्कार गरिसकिएको छ ।
एकता समाजद्वारा शोक व्यक्त
यसैबिच सउदी अरब नेपाली एकता समाजले शोकवक्तव्य जारी गर्दै श्रद्धाञ्जली व्यक्त गरेको छ ।
भदौ १० गते समाजका अध्यक्ष राजकुमार धिताल र कोषाध्यक्ष गणेश पोख्रेलको हस्ताक्षरमा जारी गरिएको शोकवक्तव्यमा भनिएको छ :
“दाङ जिल्ला घर भई हाल सउदी अरबमा काम गर्दै आउनुभएका रेशमबहादुर बुढाथोकी अकस्मात मृत्यु भएकोमा सउदी अरब नेपाली एकता समाज र कम्पनीको पहलमा उहाँको शवलाई नेपाल पठाउने काम भएको छ । उहाँका आफन्तले शव पनि भदौ ९ गते बुझिलिएको तथा भदौ १० गते दाङमै दाहसंस्कार पनि भइसकेको जानकारी प्राप्त भएको छ ।
सउदी अरब नेपाली एकता समाज मृतक रेशमबहादुर बुढाथोकीप्रति भावपूर्ण श्रद्धाञ्जली अर्पण गर्दै शोकसन्तप्त परिवारप्रति समवेदना व्यक्त गर्दछ ।”
