गोविन्दकुमार शर्मा, काठमाडौँ ।
राष्ट्रिय जनमोर्चा आगामी मङ्सिर ४ गतेको प्रतिनिधि सभा र प्रदेशसभा चुनावका लागि निर्वाचन आयोगमा दर्ता भएको छ ।
केन्द्रीय सचिव हिमलाल पुरी, कोषाध्यक्ष मधुकुमार क्षेत्री, केन्द्रीय सदस्य सुधा पौडेल र प्रतिनिधि गोविन्दकुमार शर्मासहितको प्रतिनिधि मण्डल २०७९ साउन २७ गते निर्वाचन आयोग पुगी दल दर्ता गरिएको हो ।
निर्वाचन आयोगले राजमोलाई प्रतिनिधि सभाका लागि छ क्रमाङ्क छत्तिसौँ (दर्ता नम्बर ६४०) मा दलदर्ता गरेको छ ।
सचिव पुरीका अनुसार, राष्ट्रिय जनमोर्चा बागमती प्रदेशमा क्रमाङ्क बत्तिसौँमा (दर्ता नम्बर ६४१), १ नं. प्रदेशमा क्रमाङ्क अठ्तिसौँमा (दर्ता नम्बर ६४२), मधेस प्रदेशमा क्रमाङ्क तिसौँमा (दर्ता नम्बर ६४३), गण्डकी प्रदेशमा क्रमाङ्क अट्ठाइसौँमा (दर्ता नम्बर ६४४), लुम्बिनी प्रदेशमा क्रमाङ्क उनन्तिसौँमा (दर्ता नम्बर ६४५), कर्णाली प्रदेशमा क्रमाङ्क उनन्तिसौँमा (दर्ता नम्बर ६४६) र सुदूर पश्चिम प्रदेशमा क्रमाङ्क अट्ठाइसौँमा (दर्ता नम्बर ६४७) मा दर्ता भएको छ ।
उहाँका अनुसार दर्ता क्रमाङ्क भनेको त्यो मितिसम्म दर्ता भएको पार्टीहरूको क्रम हो ।
‘उदाहरणका लागि राजमोको दर्ता क्रमाङ्क छत्तिसौँ भनेको हामीभन्दा अगाडि ३५ ओटा दल भइसकेका छन् भन्ने हो’ उहाँले भन्नुभयो– ‘दर्ता नम्बर भनेको त्यो मितिसम्म रजिस्टरमा दर्ता भएको सङ्ख्या हो ।’
उहाँले थप्नुभयो– ‘कतिपय दलले प्रतिनिधि सभा चुनावका लागि दल दर्ता गरे पनि प्रदेशसभा चुनावका लागि दल दर्ता नगरेकाले राजमोको दर्ता क्रमाङ्क थोरै छ ।’
