काठमाडौं । नेपाल पत्रकार महासंघले काँचुली खबर डटकमका कार्यकारी सम्पादक संगीन शर्मालाई सत्तारुढ दलकै नेताले कुटपिट गरेको भन्दै आपत्ति जनाएको छ । महासंघले आफ्ना बाँके शाखाका कार्यसमिति सदस्यसमेत रहेका शर्मालाई गरिएको कुटपिटको घटनाप्रति ध्यााकर्षण भएको जनाएको छ । शर्मालाई सत्तारुढ नेपाल कम्युनिष्ट पार्टी (नेकपा) का ५ नम्बर प्रदेश समिति सदस्य पुजन विश्वकर्माले गुण्डा लगाएर कुटपिट गरी घाइते बनाएको महासंघले आरोप लगाएको छ ।
महासंघका अनुसार पुस ६ गते बाँकेको कोहलपुरस्थित युगयान दैनिकको कार्यालय अगाडि बोलाएर विश्वकर्माले पत्रकार शर्मालाई गुण्डा लगाई कुटपिट गराएका थिए ।
कुनै पनि बहानामा पत्रकारमाथि गुण्डा लगाई कुटपिट गरिएको यो घटना आफैंमा निन्दनीय र आपत्तिजनक छ भन्दै दोषीमाथि कानुनी कारबाही गर्न र पत्रकार सुरक्षामा गम्भीर बन्न महासंघले स्थानीय प्रशासनसँग माग गरेको छ ।
