लोकेन्द्र पौडेल, दक्षिण भारत ।
भारतको तामिलनाडुमा एक नेपाली मजदुरको मृत्यु भएको छ । बाग्लुङ जिल्लाको जैमिनी नगरपालिका–८ छिस्ती धुर्सेनी घर भई हाल तामिलनाडुस्थित मावलीपुरमा कार्यरत भिमलाल सार्कीका छोरा ५२ वर्षीय यामलाल नेपाली भन्ने मने सार्कीको मृत्यु भएको हो ।
चेन्नैदेखि तीब्र गतिमा आउँदै गरेको कारले ठक्कर दिँदा उनको घटनास्थलमै मृत्यु भएको मूल प्रवाह अखिल भारत नेपाली एकता समाज तमिलनाडु पूर्व नगर समितिले जनाएको छ ।
सो जानकारी आउनासाथ मूल प्रवाह पूर्व नगर समितिले मावलीपुर समितिमा सम्पर्क गरेको थियो । मूल प्रवाहका सदस्य टेकराज खनालको सक्रियतामा पोष्टमार्टम लगाएतका कानुनी प्रकृया पुरा गरी मृतकका आफन्तको उपस्थितिमा चङ्गलपेटको सुरघाटमा दाहासंस्कार गरिएको छ।
मृतकको दाहासंस्कारमा मूल प्रवाहका नेता खनालसहित छोराहरु रमेश, विक्रम, आकाश, छोरी ईन्द्रा, ज्वाईं मिलन र बहिनी दिपा र डिला, तिलक, सावित्रीसहित त्यहाँ रहेका नेपालीहरु पूर्ण बहादुर, कमल, दुर्गा बहादुर थापा, प्रकाश, शिवलाल विष्टलगायत मूल प्रवाहका कार्यकर्ताको सहभागिता रहेको थियो ।
