पोखरा । राष्ट्रिय जनमोर्चाक महासचिव मनोज भट्टले राष्ट्रिय सभाले नागरिकता विधेयक फिर्ता गर्ने अपेक्षा गर्नुभएको छ ।

सोमबार नागरिकता विधेयकविरुद्ध राजमो कास्कीले आयोजना गरेको विरोध सभालाई पोखरामा सम्बोधन गर्दै नेता भट्टले २०५६ सालमा प्रतिनिधि सभाले पारित गरेको विधेयक राष्ट्रिय सभाले फिर्ता गरेको स्मरण गर्नुभयो ।

प्रतिनिधि सभाले पास गरेको नागरिकता विधेयक ऐन बन्न अझ केही प्रक्रिया बाँकी रहेकाले यसलाई अहिले नै रोक्नुपर्ने भट्टले बताउनुभयो ।

नागरिकता विधेयक खारेजीको माग गर्दै पोखराको जिरो किलोमिटरदेखि नारा जुलुससहित सिर्जना चोकमा कोण सम्पन्न भएको थियो । सभाको सञ्चालन सोमनाथ अधिकारीले गर्नुभएको थियो भने महासचिव भट्ट र राजमो गण्डकीका अध्यक्ष शंकर बरालले सम्बोधन गर्नुभएको थियो ।

यस्तो छ, महासचिव भट्टले गरेको सम्बोधनको अंश
राष्ट्रिय जनमोर्चाले नागरिकता विधेयकका विरुद्ध देशव्यापी विरोध कार्यक्रम गरिरहेको छ । प्रतिनिधिसभाले नागरिकता विधेयक सम्बन्धी संशोधन पारित गरेको छ । नागरिकता सम्बन्धी विधेयक पारित गरेका कारणले यो कानुन बन्ने प्रक्रियामा छ । तर कानुन बन्न अझै केही प्रक्रियाहरू बाँकी रहेका छन् । राष्ट्रियसभामा यो विधेयकमाथि छलफल हुन्छ । राष्ट्रिय सभाले चाह्यो भने प्रतिनिधिसभाले पारित गरेको कानुनलाई उसले फिर्ता पठाउन सक्छ । र प्रतिनिधिसभाले यसलाई अघि नबढाउन पनि सक्छ ।

हामीले २०५६ सालमा हेर्यौं भने त्यो बेलामा पनि प्रतिनिधि सभाले पारित गरेको नागरिकतासम्बन्धी कानुनलाई राष्ट्रिय सभाले फिर्ता पठायो । अहिले पनि प्रतिनिधिसभाबाट पारित भएको हुनाले कानुन बनिसकेको छैन । अझै पनि राष्ट्रिय सभाले त्यसमाथि पुनर्विचार गरेर वा प्रतिनिधि सभामा फिर्ता पठाउन सक्छ । हामीले प्रतिनिधि भामा फिर्ता पठाओस् भनेर जोडदार माग गरिरहेका छौं । नागरिकता सम्बन्धी कानुन जुन पारित भएको छ, जनताको पहलमा त्यस्ता खालका राष्ट्रघाती ऐन खारेज गर्नुपर्छ ।

नेपालको जनसंख्या अहिले पनि तीन करोड छ । तर आश्चर्यको कुरा के हो भने नेपालमा भारतीय नागरिक करिब ६० लाखले नेपालको नागरिकता लिइसकेका छन् । यो हामीले भनेका छैनौं भारतले जारी गरेको तथ्याङ्कको आधारमा भनिएको छ । २०३६ सालमा भारतको गृहमन्त्रालयले एउटा तथ्यांक सार्वजनिक गर्यो । त्यो तथ्यांकमा भन्छ भारतका नागरिकहरू संसारभरका ११० मुलुकमा बसोबास गरिरहेका छन् ।

अहिले ११० मुलुकमा भारतीयहरु फैलिएका छन् । र कतिपय मुलुकहरुमा उनीहरु बहुमतमा गएका छन् । फिजीमा उनीहरू बहुमतमा छन् । श्रीलंकामा पनि उनीहरूको दह्रो उपस्थिति छ । दक्षिण अफ्रिकाको कैयौँ मुलुकहरुमा उनीहरूको बहुमत छ । क्यानाडामा बहुमतमा पुगेका छन् । उत्तर अमेरिकाका कैयौं मुलुकमा उनीहरू बहुमतमा पुगेका छन्। करिब दुई करोड भारतीयहरु ११० मुलुकमा फैलिएका छन् । तर सबैभन्दा बढी भारतीयहरुले नेपालमा नागरिकता लिइरहेका छन् ।

२०६३ सालमा करिब २३ लाख भारतीयहरुले नेपालमा नागरिकता लिइसकेका थिए । त्यसपछि गएर जितेन्द्र देवको आयोग बन्यो । जितेन्द्र देवको आयोगले ४३ लाखलाई नागरिकता दिने भनेर योजना बनायो । ४३ लाखलाई त नागरिकता बाँड्न सकेन तर एक हप्ताभित्र ३३ हजारलाई नागरिकता बाँडे । ती नागरिकता भारतीयलाई बाँडिएको थियो । पछि सर्वोच्च अदालतले ती नागरिकतालाई खारेज गरिदियो ।