लोकेन्द्र पौडेल, दक्षिण भारत ।
मूल प्रवाह अखिल भारत नेपाली एकता समाज दक्षिण भारतको १० औँ क्षेत्रीय सम्मेलन सुरु भएको छ । सम्मेलनको उद्घाटन शनिबार एक समारोहबीच राष्ट्रिय जनमोर्चाका अध्यक्ष एवम् पूर्वउपप्रधानमन्त्री चित्रबहादुर केसीले गर्नुभयो । उद्घाटन मन्तव्य व्यक्त गर्दै अध्यक्ष केसीले अहिले देशको राष्ट्रियता गम्भीर अवस्थामा पुगेको बताउनुभयो ।
उहाँले प्रतिनिधिसभाबाट पास गरिएको नागरिकता विधेयकले अब नेपालमा नेपाली नै अल्पमतमा पर्ने अवस्था आएको बताउनुभयो । लाखौँ भारतीयलाई बंशजको नेपाली नागकिरता दिने गरी नागरिकता विधेयक ल्याइएको भन्दै उहाँले यसले देशलाई फिजी हुँदै सिक्किमीकरण गर्ने खतरा रहेको बताउनुभयो ।
कार्यक्रमलाई सम्बोधन गर्दै राजमो नेता आनन्द शर्माले लोकतन्त्र र राष्ट्रियताको आन्दोलनमा प्रवासी नेपालीको भूमिका महत्वपूर्ण रहने गरेको भन्दै राष्ट्रियता रक्षाका लागि स्वदेश विदेश सबैतिर बस्ने नेपाली जाग्नुपर्ने बताउनुभयो ।
उहाँले पार्टीले लिएको राष्ट्रियता, लोकतन्त्र र जनजीवीकाप्रतिको अडानका कारण पार्टीलाई कमजोर बनाउन लगातार साम्राज्यवादी तत्वहरु लागिरहने र पार्टीभित्रकै कतिपय व्यक्तिहरु त्यसमा प्रयोग हुने गरेको बताउनुभयो । अहिले पनि पार्टीकै नाममा कतिपय स्थानमा भेला राखेर भ्रम छर्न खोजिएको उहाँले बताउनुभयो ।
सम्मेलनलाई मूलप्रवाह अखिल भारत नेपाली एकता समाजका केन्द्रीय अध्यक्ष ठाकुर प्रसाद खनाल र केन्द्रीय सदस्य भगवती कुँवरले पनि कार्यक्रम सफलताको शुभकामना दिनुभएको थियो ।
कार्यक्रममा राजमो केन्द्रीय सदस्य मञ्जु परियार, राजमो प्रदेश नं २ का अध्यक्ष सेर बहादुर कार्की, मूल प्रवाहका महासचिव कुल बहादुर थापा, कोषाध्यक्ष मदन शर्मा, केन्द्रीय सदस्य चोब बहादुर शर्मा, जनक राज पौडेल, भगवती कुँवर, केसमान नेपाली र नरेश कुमार विक, केन्द्रीय प्रतिनिधि चन्द्राकान्त शर्माको आतिथ्यता रहेको थियो ।
चन्द्र बहादुर थापाको अध्यक्षता र धर्मराज शर्माको सञ्चालनमा अगाडि बढेको कार्यक्रममा रक्तिम सांस्कृतिक परिवारका कलाकारले स्वागत गीतद्वारा स्वागत गरेका थिए ।
