काठमाडौँ । प्रगतिशील लेखक सङ्घको छप्पन्नौँ परिसंवाद २०७९ साउन ६ गते बागबजार, काठमाडौंमा सम्पन्न भएको छ । सङ्घका अध्यक्ष डा. मधुसुदन गिरीको अध्यक्षतामा अगाडि बढेको सो कार्यक्रमका प्रमुख वक्ता सङ्घका सल्लाहकार डा. अमर गिरी हुनुहुन्थ्यो ।
“माक्र्सवादी दृष्टिमा संस्कृति” शीर्षकमा भएको परिसंवाद कार्यक्रममा बोल्दै सल्लाहकार डा. अमर गिरीले आधार र अधिरचनाको अन्तरविरोधका आधारमा नै मानव समाज परिवर्तन हुँदै आएको बताउनुभयो । उहाँले विद्यमान उत्पादन प्रणालीले संस्कृतिको निर्धारित गर्ने धारणा व्यक्त गर्नुभयो ।
‘अहिलेका नेपाली समाज जन्मसंस्कार, मृत्युसंस्कार, भाग्यवाद जस्ता परम्परागत सोचाइबाट माथि उठ्न नसक्ने सामन्तवादी संस्कृति कायम रहेको छ’ उहाँको भनाइ थियो– ‘उपभोक्तावादी, सांस्कृतिक सापेक्षतावादी, सांस्कृतिक साम्राज्यवादीका साथै बजारीकरण, वर्णशङ्करीकरण, समरूपीकरण जस्ता पुँजीवादी संस्कृतिले नेपाली समाज आक्रान्त हुँदै गएको र त्यसका विरुद्ध सांस्कृतिक आन्दोलनलाई अझ सशक्त पार्नुपर्दछ ।’
कार्यक्रमलाई सम्बोधन गर्दै परिसंवाद कार्यक्रमका संयोजक समीर सिंहले संस्कृतिको पनि वर्गीय पक्षधरता रहेको बताउँदै लेखक र साहित्यकारले सिर्जना निर्माणका साथै आफूलाई सिद्धान्तको मर्मानुसार परिमार्जन गर्दै जानुपर्ने बताउनुभयो ।
प्रलेसको उपाध्यक्ष नमुना शर्माको सञ्चालनमा अगाडि बढेको सो कार्यक्रममा मातृका पोखरेल, प्रा.डा. जीवेन्द्र देव गिरी, प्रा.डा. पशुपतिनाथ तिमिल्सेना, डा. धनप्रसाद सुवेदी, गोपाल अश्क, डा. हरि सिलवाल, आर.सी. न्यौपाने, सीता शर्मा, डा. शालिकराम तिमिल्सेना, प्रकाश तिवारीलगायतले टिप्पणी गर्नुभएको थियो ।
