खिमराज चालिसे, हैदरावाद ।
राष्ट्रिय जनमोर्चाका अध्यक्ष चित्रबहादुर केसीले अहिले राष्ट्र र राष्ट्रियता नै गुम्ने खतरा उत्पन्न भएको बताउनुभएको छ ।
मूल प्रवाह अखिल भारत नेपाली एकता समाज मध्य दक्षिण भारतको छैठौं क्षेत्रीय सम्मेलनको उदघाटन गर्दै अध्यक्ष केसीले सो कुरा बताउनुभएको हो ।
उहाँले एकता समाजको ऐतिहासिक उपलब्धीबारे चर्चा गर्दै यो संगठन भारतबाट शुरु भएता पनि वर्तमानमा विश्वका धेरै देशहरुमा एकता समाज स्थापना भएको बताउनुभयो ।
विश्वका विभिन्न देशहरुमा रहेका नेपाली एकता समाजका संगठनहरुलाई विश्व पुँजीवाद एवम् साम्राज्यवादी विरुद्ध पार्टीले प्रशिक्षित गर्दै आइरहेका उहाँले बताउनुभयो । तर अरु पार्टीमा साम्राज्यवाद विरुद्ध जनतालाई प्रशिक्षित गर्ने नीति नभएको पनि केसीले स्पष्ट पार्नुभयो ।
केसीले मूल प्रवाहले आफ्नो गौरवमय यात्रामा विभिन्न भड्काव विरुद्ध सशक्त प्रतिवाद गर्दै स्वदेशको प्रजातान्त्रिक आन्दोलनमा समेत महत्वपूर्ण भूमिका खेलेको बताउनुभयो ।
सम्मेलनमा मूल प्रवाहका केन्द्रीय अध्यक्ष ठाकुर खनाल, केन्द्रीय उपाध्यक्ष प्रेम पौडयाल, सचिवालय सदस्य धनवीर पुनमगर, मूल प्रवाह केन्द्रीय सदस्य एवम् महिला केन्द्रीय संयोजक फुलबिना पौडयाल, केन्द्रीय सदस्यहरु भिम बहादुर थापा, कृष्ण बहादुर थापा, रण बहादुर पौड्याल लगाएत नेताहरुले सम्बोधन गर्नुभएको थियो ।
रामप्रसाद पौडयालको अध्यक्षता तथा तिलक रानाको सञ्चालनमा सम्पन्न भएको कार्यक्रममा स्वागत रुपलाल जिएमले गर्नु भएको थियो ।
