काठमाडौं । नेकपा (एमाले) का सांसद निरु पालले प्रदेश संरचना खारेज गर्न माग गर्नुभएको छ ।
सामाजिक सञ्जालमा स्ट्याटस लेख्दै एमाले नेत्री पालले संघीयता जनताको लागि भन्दा पनि नेता व्यवस्थापनका लागि सम्झौता गरिएको बताउनुभएको छ।
पालले संघीयता अन्तर्गतको प्रदेश संरचना खारेज गरी स्थानीय तहलाई बलियो बनाउनसमेत माग गर्नुभएको छ ।
पालले लेख्नुभएको छ, ‘देश र जनताको लागि घाँडो बनेको प्रदेश संरचना खारेज भए धेरै राम्रो हुन्थ्यो। जनताको लागि भन्दापनि नेताको व्यवस्थापन, नेताका आसेपासे पाल्नका लागि सम्झौता गरेको प्रदेश संरचना खारेज गरि स्थानीय निकायलाई अझै बढी अधिकार सम्पन्न बनाई जनताको घरघरमा सेवा दिन सके उत्तम।एकपटक सोच्ने बेला भयो कि ?’
पालले लेखेको उक्त स्ट्याटसमा कमेन्ट गर्ने अधिकांशले सो भनाईलाई समर्थन गर्दै संघीयता खारेजीका लागि पहल गर्न आग्रह गरेका छन् ।
स्मरणीय छ, एमालेमा नेत्री पालसहित गोकुल बास्कोटा, महेश बस्नेतलगायतका नेताहरुले संघीयता खारेजीको माग गर्दै आएका छन् ।
यसै सन्दर्भमा सोमबार मात्रै एमाले अध्यक्ष एवम् पूर्वप्रधानमन्त्री केपी शर्मा ओलीले संघीयता असफल हुँदै गएको बताउनुभएको छ ।
संघीयताविरुद्ध राष्ट्रिय जनमोर्चाले निरन्तर संघर्ष गर्ने गरेकोमा पछिल्ला दिनमा यसविरुद्ध जनमत बढ्दै गएको छ ।
