तमघास । गुल्मीका पाँचओटा पालिकामा स्थानीय पाठ्यक्रम लागु गरिएको छ । जिल्लाको धुर्कोट, कालीगण्डकी, गुल्मीदरबार गाउँपालिका तथा रेसुङ्गा र मुसिकोट नगरपालिकाले स्थानीय पाठ्यक्रम लागु गरेका हुन् ।
धुर्कोट गाउँपालिकाले शैक्षिकशत्र २०७७ देखि स्थानीय पाठ्यक्रम लागु गरेको थियो । कक्षा ५ सम्म लागु गरिएको स्थानीय पाठ्यक्रम यसै शैक्षिक शत्रदेखि कक्षा ८ सम्म सञ्चालन गर्ने तयारी गरेको शिक्षा शाखा प्रमुख दामोदर घिमिरेले जानकारी दिनुभयो ।
यो वर्षदेखि कक्षा ८ सम्म नै स्थानीय पाठ्यक्रम लागु गर्ने गाउँपालिकाको तयारी छ । ‘पाठ्यक्रम तयार गरी यसै वर्षबाट लागु हुन्छ’ उहाँले भन्नुभयो– ‘पाठ्यपुस्तक अर्को वर्ष आइपुग्छ ।’
पाठ्यक्रममा धुर्कोटका धार्मिक, ऐतिहासिक एवं पर्यटकीय स्थल, भूगोल, आर्थिक पक्षलगायत विषय समेटिएको गाउँपालिकाले जनाएको छ ।
गुल्मी दरबार गाउँपालिकामा अघिल्लो शैक्षिक शत्रदेखि कक्षा १ मा स्थानीय पाठ्यक्रम लागु गरिएको थियो । पाठ्यक्रम कक्षा ३ सम्मका लागि तयार भए पनि पाठ्यपुस्तक लेखनको काम बाँकी रहेकाले लागु नगरिएको शिक्षा शाखा प्रमुख नरेन्द्रप्रसाद शर्माले जानकारी दिनुभयो ।
‘कक्षा २ र ३ को पाठ्यपुस्तक लेखन कार्य चल्दै छ, यही वर्षदेखि कक्षा २ मा लागु हुन्छ’ उहाँले भन्नुभयो– ‘संस्कृति, आर्थिक स्थिति, स्थानीय सिपलगायत विषयलाई प्राथमिकतामा राखेका छौँ ।’
गुल्मी दरबारमा दुईओटा निजी र २९ ओटा सामुदायिक विद्यालय छन् । पुस्तकका लागि छपाइ खर्च रु डेढ लाख र लेखन खर्च रु तीन लाख लागेको शाखा प्रमुख शर्माले बताउनुभयो ।
कालीगण्डकी गाउँपालिकाले गत वर्षदेखि नै कक्षा १ र २ मा स्थानीय पाठ्यक्रम लागु गरेको थियो । यो वर्ष कक्षा ३, ४, ६ र ७ मा लागु गर्ने शिक्षा शाखा प्रमुख अग्निधर लोहनीले बताउनुभयो । पाठ्यक्रममा कालीगण्डकीको परिचय, बिपत्सम्बन्धी योजना, विपद् न्यूनीकरणमा गाउँपालिकाको योजना, दैवी प्रकोपलगायत विषय समेटिएको छ । पुस्तकका लागि गत वर्ष छपाइ खर्च रु दुई लाख ५२ हजार र बैठक, खाजा खर्च एवम् लेखाइ खर्चमा रु एक लाख खर्च भएको उहाँले जानकारी दिनुभयोे ।
अर्को वर्ष कक्षा ५ र ८ मा पनि स्थानीय पाठ्यक्रम लागु गर्ने तयारी छ । कालीगण्डकीमा रहेका दुईओटा निजी विद्यालयमा पनि पाठ्यक्रम लागु गरिएको छ । सबै विद्यार्थीले पाठ्यपुस्तक निःशुल्क प्राप्त गरेका छन् ।
रेसुङ्गा नगरपालिकाले यसै शैक्षिक शत्रदेखि स्थानीय पाठ्यक्रम कक्षा ८ सम्म लागु गरेको छ । कुल २५० थान पुस्तक छापेर विद्यालयलाई प्रदान गरिएको शिक्षा शाखा प्रमुख विष्णु ज्ञवालीले जानकारी दिनुभयो । पाठ्यक्रम १०० पूर्णाङ्कको रहेको छ । यसका लागि कुल रु तीन लाख ५० हजार खर्च भएको उहाँको भनाइ थियोे ।
दुई पालिकामा यसै वर्षबाट लागु हुने
मुसिकोट नगरपालिकामा पाठ्यक्रम निर्माणको अन्तिम चरणमा छ । यसै वर्ष कक्षा ५ सम्म लागु गर्ने आगामी वर्ष कक्षा ८ सम्म लागु गर्ने तयारी रहेको शिक्षा शाखा प्रमुख प्रकाश नेपालीले जानकारी दिनुभयो । साउनको अन्तिमसम्म विद्यालयको पहुँचमा पाठ्यक्रम पुगिसक्ने उहाँले बताउनुभयो ।
सत्यवती गाउँपालिकामा पाठ्यक्रम बनेर पनि पाठ्यपुस्तक लेखनको काम हुँदै छ । पाठ्यक्रम लेखनको काम यही आर्थिक वर्षमै सकिने शिक्षा शाखा प्रमुख विष्णुप्रसाद ज्ञवालीले जानकारी दिनुभयो ।
कुल रु १० लाखको लागतमा सत्यवतीले कक्षा ८ सम्म स्थानीय पाठ्यक्रम लागु गर्दै छ । पाठ्यक्रममा स्थानीय संस्कृति, स्थानीय सीप, कला, धर्म, भाषा, भूगोल अर्थात् समग्र पालिकाको परिचय समेटिएको छ । पुस्तक विद्यार्थीका लागि निःशुल्क प्रदान गर्ने योजना रहेको छ । (रासस)
