बेसिसहर । नमुना प्रकाशन तालिम तथा अनुसन्धान विभागको तर्फबाट दुई दिवसीय “शिक्षक एवम् शिक्षण पेसा एक सामूहिक पुनरावलोकन” विषयमा शिक्षक तालिम कार्यक्रम सुरु भएको छ ।
लमजुङको राइनास न.पा.४ स्थित सौभाग्योदय माविमा २०७९ असार ४ गतेबाट भैरहेको सो तालिममको प्रमुख प्रशिक्षक सहप्राध्यापक डा.चुडा ढकाल हुनुहुन्छ ।
‘शिक्षकको भूमिका किताब रटाउने मात्र होइन, त्यो समाजको आँखा पनि हुनुपर्दछ† नयाँ परिस्थितिअनुसार शिक्षकको पढाउनै शैलीमा परिवर्तन गर्नुपर्दछ† शिक्षण पेसा मानिसको जीवन र व्यवहारसँग जोडिनुपर्दछ’ लगायतका मूल्यमान्यताका साथ निरन्तर देशका विभिन्न स्थानमा अनुसन्धानमूलक तरिकाबाट शिक्षक तालिम चलाउँदै आएको नमुना प्रकाशन विभागले अहिले लमजुङका शिक्षकबिच प्रशिक्षण कार्यक्रम सञ्चालन गरिरहेको छ । असार ५ गतेसम्म सञ्चालन हुने सो कार्यक्रममा अङ्ग्रेजी, गणित, विज्ञानलगायतका विषयलाई व्यवहारसँग जोड्दै प्रशिक्षण दिइने बताइएको छ ।
राइनास नगरपालिकाका प्रमुख प्रशासकीय अधिकृत गोकर्णराज सुयलको प्रमुख आतिथ्यमा सम्पन्न सो कार्यक्रमको अध्यक्षता विद्यालय व्यवस्थापन समितिका अध्यक्ष स्वतन्त्र हमालले गर्नुभएको थियो ।
कार्यक्रममा स्वागत मन्तव्य प्रधानाध्यापक दिननाथ त्रिपाठीले गर्नुभएको थियो भने परिचय मन्तव्य नमुना प्रकाशन विभाग प्रमुख रमेश पौडेलले राख्नुभएको थियो ।
वडा नं. ३ का अध्यक्ष देउबहादुर पौडेल, वडा नं. ४ का अध्यक्ष बलराम पराजुली, शिक्षा शाखा प्रमुख पूर्णबहादुर अछामी, आधारशिला कलेजका अध्यक्ष भोला ढकाल, अक्सफोर्ड स्कुलका शिक्षक विष्णुहरि देवकोटालगायतको सो कार्यक्रममा आतिथ्य रहेको थियो ।
