वापी । गुजरातको वापी चनोद दुवार्केशमा नयाँ बन्दै गरेको बिल्डिङमा करेन्ट लागेर एक जना नेपाली महिलाको मृत्यु भएको छ ।
अछामको तुर्माखाद गाउँपालिका–४ जैइसुरका किसन नेपालीकी श्रीमती २१ वर्षीया सुनिता नेपालीको निधन भएको हो ।
उनीहरु त्यहाँ बन्दै गरेको नयाँ विल्डीङमा काम गर्दै आएका थिए ।
ग्यालेनमा पानी भर्न लाग्दा १० तला बन्दै गरेको विल्डिङमा इँटा माथि खिच्नका लागि राखिएको तारमा करेन्ट लागेर निधन भएको मृतकका श्रीमान किसन बताए । मृतकका दुई वर्षीय छोरा छन् ।
श्रीमतीलाई करेन्ट लागेको र बचाउनका लागि दिएको आवाज आफूले सुनेता पनि बचाउन तल आउँदा आउँदै सुनिताको प्राण गइसकेको किसनले बताए । किसन त्यहाँ काममा लागेको १५ दिन मात्र भएको विल्डिङ ठेकेदारले बताएका छन् ।
स्थानीय नेपालीहरुले विल्डिङ मालिकसँग मिली दाहसंस्कार गर्न ७ हजार र घर अछाम जान १५ हजार दिने सहमति गरेको नविन खवासले बताएका छन् । घटनाको जानकारी मूल प्रवाह अखिल भारत नेपाली एकता समाज वापी पूर्व नगरका अध्यक्ष भुवन सिंह धामीलाई प्राप्त भएपछि धामी सहितको प्रतिनिधि मण्डल उक्त स्थानमा पुगेको थियो ।
घटनाबारे पोलीस रिपोर्ट, पोस्टमार्टम र पञ्चनामा गरेमा मात्र शव दाहसंस्कार हुने अडान मूल प्रवाहका प्रतिनिधिहरुले लिएका छन् ।
मूल प्रवाहका प्रतिनिधि मण्डलले मकान मालिकसँग त्यहाँ कार्यरत मिस्त्री लेवरको गम्भीर गल्तीका कारण घटना घटेको भन्दै जिम्मेवार लिनुपर्ने र जिम्मेवारी नलिए कानुनी कारबाहीको लागि यो पीडितलाई समाजले साथ दिने बताएका थिए । केन्द्रीय सदस्य रमकला काउछा, केन्द्रीय महिला विभाग सदस्य बिना काउछा, वापी पूर्व नगर अध्यक्ष भुवन सिंह धामी लगाएतको उपस्थितिमा छलफल भएको थियो ।
श्रीमती गुमाएका किसनले २ वर्षको बच्चा लिएर नेपाल जाने मनस्थिती बनाएपछि मूल प्रवाले विल्डिङ मालिकसँग १ लाख ६१ हजार रुपैयाँ क्षतिपुर्ति दिलाएको छ ।
