काठमाडौं । नेकपा (माओवादी केन्द्र) एमाले अध्यक्ष केपी ओलीले प्रतिगमन गरेको भन्दै पाँच दलीय गठबन्धनमा सामेल छ । तर चुनाव जित्नका लागि भने माओवादीले जिल्ला जिल्लामा एमालेसँग साँठगाँठ गरेको छ ।
हालै बसेको पाँचदलीय गठबन्धनका शीर्ष नेताहरुको बैठकले कार्यपालिका र जिल्ला समन्वय समितिमा मिलेर जाने निर्णय गरेका छन् । त्यो निर्णयमा माओवादीका अध्यक्ष पुष्पकमल दाहाल प्रचण्डको पनि हस्ताक्षर छ । तर, माओवादीकै केन्द्रीय नेताहरुले भने विभिन्न जिल्लामा जिसस र पालिकामा एमालेसँग साँठगाँठ गरेका छन् ।
गएको स्थानीय निर्वाचनमा कैयौं पालिकामा एमालेसँग गठबन्धन गरेर चुनाव जितेको माओवादीले जिल्ला समन्वय समिति र कार्यपालिकाहरुमा एमालेसँग मिलेर गठबन्धनकै अन्य दललाई हराउन लागिपरेको देखिन्छ ।
कैलालीमा रेशम चौधरीको नागरिक उन्मुक्ति पार्टी, नेकपा एमाले र माओवादी केन्द्रबीच जिल्ला समन्वय समितिमा मिलेर जाने सहमति भएको छ । ३० गते हुने जिसस कैलालीको निर्वाचनमा यी तीन दलले अध्यक्षसहित दुई सदस्य नागरिक उन्मुक्ति पार्टीलाई, उपाध्यक्षसहित २ सदस्य एमालेलाई र ४ सदस्य माओवादी केन्द्रलाई दिने सहमति समेत गरेका छन्।
नागरिक उन्मुक्ति पार्टीका केन्द्रीय सदस्य दामोदर पण्डित, माओवादी केन्द्रका जिल्ला इन्चार्ज हरि ज्ञवाली तथा एमाले उपाध्यक्ष दुर्गा जोशीलगायतको उपस्थितिमा यस्तो सहमति भएको हो ।
१३ स्थानीय तह रहेको कैलालीमा जिससको निर्वाचनका लागि २६ मत छ भने बिहीबार नागरिक उन्मुक्ति पार्टी, एमाले र माओवादीबीच सहमति भएसँगै उनीहरुको मत १६ पुग्ने भएको छ।
यता, माओवादीसँग स्थानीय चुनावमा गठबन्धन गरेका नेपाली कांग्रेस र नेकपा (एकीकृत समाजवादी) भने जिससबाट बाहिरिने भएका छन् ।
यसैगरी माओवादीले धनकुटामा पनि एमालेसँग साँठगाँठ गरेको छ । धनकुटाका कार्यपालिकाको निर्वाचनमा एमालेसँग गठबन्धन गरेको हो । एमाले केन्द्रीय सदस्य राजेन्द्र राई र माओवादीका केन्द्रीय सदस्य हेमराज भण्डारी लगायतको उपस्थितीमा सो सहमति भएको हो ।
