साउदी अरब । साउदी अरबमा मृत्यु भएका अर्घाखाँचीका युवक कमल बहादुर घर्तीको शव नेपाल पठाइएको छ ।
अर्घाखाँचीको भूमिकास्थान नगरपालिका असुरकोट बुधनमारा–५ का घर्ती मगर साउदी बाट छुट्टीमा घर गएर फर्किने क्रममा साउदी रियाद एरपोर्ट पुगि सकेपछि बिरामी परेका थिए । सोही क्रममा उनको निधन भएको थियो ।
परिवारको समपर्कमा नआएपछि श्रीमती पुना मगरले साउदी अरब नेपाली एकता समाजलाई कमलबारे सोधीखोजी गरिदिन आग्रह गर्नुभएको थियो ।
त्यसपछि नेपाली एकता समाजका महासचिव जेबी फौजाले कमल काम गर्ने गरेको कम्पनीमा कार्यरत नेपाली राम बाबुलाई सम्पर्क गरि पत्ता लगाउन आग्रह गर्नुभएको थियो । सोधखोजका क्रममा कम्पनीले कमल बहादुर मगर उपचारको क्रममा साउदी स्थित रियाद युनिभर्सिटी अस्पतालमा भर्ना गरिएको जानकारी दियो ।
एकता समाजका केन्द्रीय सचिव खुमिराम भन्डारीले सो अस्पतालमा गएर बुझ्दा कमलको मृत्यु भएको जानकारी प्राप्त भयो । त्यसपछि एकता समाजले परिवारलाई मृत्युबारे खबर गर्नुका साथै शव नेपाल पठाउन पहलकदमी लिएको थियो ।
एकता समाजको पहल र साउदीस्थित नेपाली राजदूतावासको सहयोगमा १९ मे का दिन कमलको शव श्रीलंका हुँदै काठमाडौं पठाइएको थियो । काठमाडौंदेखि घर अर्घाखाँचीसम्म कम्पनीले नै खर्च ब्यहोरी घर परिवारलाई शव बुझाईएको साउदी अरब नेपाली एकता समाजका केन्द्रीय सचिव खुमिराम भन्डारीले जानकारी दिनु भयो ।
कमलको दाहसंस्कार भइसकेको जानकारी प्राप्त भएको छ ।
