नेपालगञ्ज । अखिल नेपाल स्वतन्त्र विद्यार्थी युनियन (छैठौं) ले संघीयता विरुद्व ‘विद्यार्थी मार्च’ अभियानका लागि देशव्यापीरुपमा भेला, सम्मेलन, प्रचार प्रसार लगायतका संगठनात्मक अभियान गरिरहेको छ । यसै क्रममा मंगलबार बाँके–बर्दियाको संयुक्त जिल्ला भेला सम्पन्न भएको छ।
अखिल (छैठौं)का अध्यक्ष विमल पोख्रेलको प्रमुख आतिथ्यतामा सम्पन्न भेलाले सघीयता विरुद्धको काठमाडौं केन्द्रित आन्दोलन व्यवस्थित र व्यापक बनाउन सामूहिक छलफल र बढी भन्दा बढी विद्यार्थी सहभागिता गराउने निर्णय गरेको छ ।
कार्यक्रमलाई अखिल (छैठौं) का महासचिव महेशराज जोशी, अखिल नेपाल सुकुम्वासी संघका केन्द्रीय अध्यक्ष तुल्सी सापकोटा, राष्ट्रिय जनमोर्चा बाँके जिल्ला अध्यक्ष भिमप्रसाद देवकोटा, राजमो जिल्ला उपाध्यक्ष जगदिश ढकाल, अखिल नेपाल युवक संघका जिल्ला अध्यक्ष भरत खड्का,अखिल नेपाल महिला संघकी जिल्ला सल्लाहाकार माला केसीलगायतले शुभकामना दिनुभएको थियो । अखिल (छैठौं) बाँके जिल्ला सचिव राजु चौधरीको सञ्चालनबाट अघि बढेको कार्यक्रमको अध्यक्षता बाँके जिल्ला अध्यक्ष नमराज चन्द गर्नुभएको थियो भने स्वागत वैकल्पीक केन्द्रीय सदस्य विष्णु अधिकारी गर्नुभएको थियो ।
भेलाले बाँके र बर्दियाजिल्लाको भेला गरि आर्थिक अभियान, प्रचार प्रसार तथा संगठन विस्तारको कार्यलाई तिब्र रुपमा अगाडि बढाउने र काठमाडौं केन्द्रित आन्दोलनलाई भव्यरुपमा सफल बनाउने निर्णयसमेत गरेको प्रदेश नम्बर ५ का इन्चार्ज महासचिव जोशीले जानकारी दिनुभयो ।
