काठमाडौं । विभागीय टोली नेपाल पुलिस क्लबले छैटौं आरबीबी एनभीए राष्ट्रिय महिला तथा पुरुष भलिबल क्लब लिगमा अपराजित यात्रा कायमै राखेको छ ।
बिहीबार भएको महिलातर्फको खेलमा पुलिस क्लबले न्यू डायमण्डलाई २५–११, २५–१७, २५–१५ पराजित गर्यो। पुलिस क्लबले लिगका ३ खेलमा लगातार तीन जित हात निकालेको छ । जितसँगै पुलिसले अंक तालिकामा ९ अंक बनाएको छ ।
बिहीबार नै भएको महिलाको अर्को खेलमा शसस्त्र प्रहरी बलको एपीएफले एभरेष्ट भलिबल क्लबलाई २५–१३, २५–१०, १९–२५, २५–१९ ले पाखा लगायो। एपीएफले ३ खेलबाट ६ अंक बनाएको छ ।
आजै भएको पुरुषतर्फको खेलमा गलकोट स्पोर्टस् क्लब र हेल्प नेपालले जित दर्ता गरेका छन्। गलकोटले ढोरपाटन स्पोर्टस् क्लबलाई ३–२ सेटमा हरायो । गलकोटले ढोरपाटनलाई २३–२५, २५–१५, १८–२५, २५–२२, १५–८ ले पराजित गरेको हो । गलकोटले अंक तालिकामा २ अंक् जोड्दा ढोरपाटनको १ अंक छ ।
अर्को खेलमा टिपटप हेल्प नेपाल स्पोर्टस् क्लबले पुलिस क्लबलाई ३–० को सोझो सेटमा हरायो। हेल्प नेपालले पुलिस क्लबलाई २५–२३, २५–२३ र २५–२० को जित निकालेको हो । जितसँगै हेल्प नेपालको अंक तालिकामा ११ अंक भएको छ। आर्मीको १२ अंक छ ।
