नेपालगञ्ज । आइतबार बिहान ट्रकको ठक्करबाट एक बालिका घाइते भएपछि बाँकेको कोहलपुर क्षेत्र तनावग्रस्त बनेको छ । भीड नियन्त्रण गर्न प्रहरीले गोली चलाउँदा तीन जना घाइते भएका छन् ।
प्रहरीले चलाएको गोली लागेर त्रिभुवन माविमा कक्षामा ९ का विद्यार्थी सुशील थापा गम्भीर घाइते भएका छन् । घाइते भएका थप दुई जनाको पहिचान खुलेको छैन । थापाको अहिले नेपालगन्ज शिक्षण अस्पताल कोहलपुरमा उपचार भइरहेको छ प्रत्यक्षदर्शीले जनाएका छन्।
आइतबार बिहान बाँकेको कोहलपुर–नेपालगञ्ज सडकखण्ड अन्तर्गत हाईस्कुल चोकमा ट्रकको ठक्करबाट एक बालिका घाइते भएपछि अहिले सो क्षेत्र तनावग्रस्त बनेको हो । कोहलपुर वडा नं १० मा रहेको त्रिभुवन माविमा अध्ययनरत छात्रा प्रकृती चन्दलाई ना २ ख ९४५९ नम्बरको ट्रकले किचेको थियो ।
बालिकालाई ठक्करदिने ट्रकमा सोही विद्यालयका विद्यार्थी र स्थानीयले आगजनी गरेका छन्।बालिकालाई ठक्कर दिएपछि ट्रकका चालक भागेर इलका प्रहरी कार्यालय कोहलपुरमा पुगेका थिए। प्रहरीले ट्रकका चालकलाई जोगाउन खोजेको भन्दै स्थानीय र विद्यार्थीले प्रहरी चौकी घेराउ गर्नुका साथै दर्जनभन्दा बढी गाडीमा तोडफोड गरेका छन्। उनीहरुले बजार बन्द गराउनुका साथै सवार आवागमनदलाई ठप्प पारेका छन्।
स्थानीयवासीले प्रहरी चौकी घेराउ गर्नुका साथै प्रहरीमाथि नै आक्रमण गर्न थालेपछि प्रहरीले थुप्रै शेल अश्रु ग्यास प्रहार गर्नुका साथै हवाइ फायरसमेत गरेको छ।
प्रदर्शनकारीको ढुंगामुढाबाट कोहलपुरका प्रहरी प्रमुख डीएसपी हेमराज शाहीसहित ९ जना प्रहरी घाइते भएका छन् । शाही लगायतको अहिले कोहलपुर शिक्षण अस्पतालमा उपचार भइरहेको प्रहरीले जनाएको छ ।
(यसअघिको समाचारमा स्रोतको भनाई उल्लेख गर्दै ट्रकले किचेकी बालिकाकाे मृत्यु भएको ब्यहोरा उल्लेख भएकोमा क्षमाप्रार्थी छौं– सं)
