काठमाडौं । टर्कीको राजधानी इस्तानबुलको बोयग्लुबाट ३७ जना नेपाली पक्राउ परेका छन् । गत सोमबारको सो घटनामा पक्राउ परेका नेपालीहरुमध्ये अधिकांशसँग त्यहाँ जाने अनुमतिपत्र नभएको पुगेको बीबीसीले जनाएको छ ।
उनीहरूलाई प्रान्तीय आप्रवासी प्रशासनको निष्कासन केन्द्र लगिएको पक्राउ परेका एक नेपाली सुविन्द्र तामाङले बताएका छन् । त्यहाँ पुग्दासम्म कसैमाथि पनि शारीरिक दुर्व्यवहार नभएको उनले प्रस्ट्याए ।
तामाङ एक वर्षअघि श्रमिकको रूपमा टर्की पुगेका थिए। केही समयअघि भिसा अवधि सकिएपछि पर्यटन अनुमतिपत्र लिएको र छिट्टै नेपाल फर्कने तयारीमा रहेको उनको दाबी छ।
उनीहरूलाई छोडेको भोलिपल्ट अर्का एक जनालाई ३० दिनभित्र टर्की छोड्ने चेतावनीपत्रसहित रिहा गरिएको टर्कीस्थित गैरआवासीय नेपाली सङ्घका अध्यक्ष उज्ज्वलकुमार घिसिङलाई उदृत गर्दै बीबीसीले जनाएको छ । बाँकी ३४ जना हाल प्रहरी नियन्त्रणमै छन्।
पक्राउ परेका अधिकांश नेपाली टर्की हुँदै युरोप प्रवेश गर्ने उद्देश्यले त्यहाँ पुगेको बताइएको छ ।
टर्कीको राजधानी इस्तानबुलबाट ग्रिसको सीमा करिब २६० किलोमिटर मात्र छ। राजधानीबाट लगभग पाँच घण्टाको गाडी यात्रा पछि सीमासम्म पुग्ने र त्यहाँबाट पैदल ग्रिस छिर्ने नेपालीहरूको सङ्ख्या बढ्दो रहेको अध्यक्ष घिसिङले जानकारी दिनुभयो ।
पछिल्लो समय विविध माध्यममार्फत भारत, इराक र इरानलगायत देशहरूबाट टर्की हुँदै मानव तस्करको सहयोगमा युरोपतर्फ बाटो तताउनेहरू उल्लेख्य देखिएको उनले बताए। त्यसरी गैरकानुनी ढङ्गमा युरोप जान खोज्नेहरू दुर्घटना, अपहरण, लुटपाट र कुटपिटको सिकार हुने गरेको घिसिङको भनाई छ ।
