टेकराज भुसाल(टेकु),बुटवल ।
प्रगतिशील लेखक संघ नेपाल, रुपन्देहीको आयोजनामा बुटवलमा साहित्य महोत्सव तथा पुस्तक प्रदर्शनी शुरु भएको छ । शुक्रबारदेखि शुरु भएको साहित्य प्रदर्शनी २२ गतेसम्म चल्ने छ ।
पुस्कत प्रदर्शनी उद्घाटन कार्यक्रममा बोल्दै प्रदेश नं.५ का सामाजिक विकासमन्त्री सुदर्शन बरालले प्रगतिबादी साहित्यले राजनीतिक परिवर्तनमा सहयोग गरेको बताए । उनले प्रदेश ५ को भूगोलले बहुभाषिक र बहुसंस्कृतिको प्रतिनिधित्व गरेको बताए । प्रदेशमा रहेको विविधताको साहित्य, कला र संस्कृतिलाई पूँजीको रुपमा संरक्षण गर्नुपर्ने उनको भनाई थियो ।
प्रगतिशील लेखक संघ, नेपालका केन्द्रीय अध्यक्ष प्राध्यापक डाक्टर जीवेन्द्रदेव गिरीले राजनीतिक परिवर्तनसँगै समाजलाई सांस्कृतिक रुपमा रुपान्तरण गर्नुपर्ने बताए । परिवर्तनको क्षेत्रमा प्रगतिशील लेखक संघको भूमिका महत्वपूर्ण रहँदै आएको उल्लेख गर्दै साहित्यको भूमिकालाई अभियानको रुपमा अगाडि बढाउनुपर्नेमा उनले जोड दिए ।
पुस्तक प्रदर्शनीको पहिलो दिन संस्कृति र साहित्यवीचको अन्तरसम्बन्ध विषयमा घनश्याम कोइराला, साहित्यमा जनस्वास्थ्य डा। राजेन्द्र खनाल, पठन संस्कृतिको विषयमा वरिष्ठ आख्यान्नकार जंगबहादुर शाहले चर्चा गरेका थिए ।
पुस्तक प्रदर्शनीको पहिलो दिन करिब ३ हजार जनाले अवलोकन गरेको र ९० हजार रुपैयाँको पुस्तक बिक्री भएको आयोजक संस्थाका सचिव श्यामलाल पोखरेलले जानकारी गराए । साहित्य कार्यक्रम अध्यक्ष दलबहादुर गुरुङको अध्यक्षता र शरिता श्रीसको सञ्चालनमा भएको थियो । साहित्यकार बुंद राना, रामचन्द्र भट्टराई, रुद्र वली, मिनबहादुर राना लगायतका स्रष्टाहरुले गजल र कविता वाचन गरेका थिए ।
पठन संस्कृति हराउँदै कमजोर हुँदै गएकाले नयाँ पुस्तामा पठन संस्कृतिको विकास गराउने उद्वेश्यले पुस्तक प्रदर्शनी आयोजना गरिएको हो । पुस्तक प्रदर्शनीमा यस क्षेत्रका लेखक तथा साहित्यकारहरुको सहभागिता रहेको छ । यस क्षेत्रको साहित्य, कला,संस्कृति र संङ्गीतको वर्तमान र भविश्यबारे छलफल गरिने छ ।
साहित्य महोत्सव तथा पुस्तक प्रदर्शनीमा दशहजार दर्शकले अवलोकन गर्ने र करिव ५ लाखको पुस्तकहरु बिक्री हुने आयोजकले अपेक्षा गरेका छन् ।
