पोखरा । बागलुङ क्षेत्र नम्बर २ (ख)बाट निर्वाचित गण्डकी प्रदेशसभा सदस्य खिमविक्रम शाहीले पद तथा गोपनियताको सपथ लिनुभएको छ ।विहीबार सभामुख नेत्रनाथ अधिकारीबाट शाहीले पद तथा गोपनियताको सपथ लिनुभएको हो ।
राष्ट्रिय जनमोर्चाका तर्फबाट नेकपाको सहयोगमा निर्वाचित शाहीले नीति निर्माण र जनताको समस्या सम्वोधन गर्न आफूले प्रभावकारी भूमिका निभाउने बताउनुभयो ।
बागलुङको सो निर्वाचन क्षेत्रबाट यसअघि राजमोकै टेकबहादुर घर्ती सभासद हुनुहुन्थ्यो । घर्तीको गतवर्षको मंसिर २७ गते निधन भएपछि सो निर्वाचन क्षेत्रमा उपचुनाव भएको हो ।
अघिल्लो चुनावमा निसीखोला गाउँपालिका अध्यक्षमा चुनाव उठे पनि शाही पाराजित हुनुभएको थियो । यसपटक वाम गठबन्धनको तर्फबाट उपनिर्वाचनमा कांग्रेसका जीतबहादुर सेरचनालाई हराउँदै प्रदेश सभासद बन्नुभएको हो ।
त्यो बेला उनी कांग्रेसका उम्मेदवार तारानाथ पौडेलसँग ७ सय मतले हारेका शाही मंसिर १४ गते भएको उपनिर्वाचनमा २ हजार ९७ मतले निकटत्म प्रतिद्धन्द्धीलाई पराजीत गर्दै प्रदेश सभासद बन्नुभएको हो । शाहीले ११ हजार २ सय ३५ मत ल्याउँदा सेरचनको ९ हजार १ सय ३८ मत आएको थियो ।
