कुवेत । कुवेतको कुवेत सिटीमा नेपाली मौलिक संस्कृति झल्काउने पोशाक, नेपाली खाना, नेपाली घरेलु उत्पादनका सामग्रीहरू, निर्यातयोग्य वस्तुहरू, पर्यटन प्रवर्द्धनसँग सम्बन्धित सामग्री प्रदर्शन गरिएको छ ।
कुवेतको ‘स्वतन्त्रता र मुक्ति दिवस’ तथा अन्तर्राष्ट्रिय महिला दिवसको अवसरमा स्थानीय डिनरी अफ डिप्लोमेटिक र डिप्लोमेटिक ओमेन कमिटीको संयुक्त तत्वावधानमा यही १९ मार्च २०२२ का दिन ‘कल्चरल एण्ड इन्टरटेन्मेन्ट’ कार्यक्रममा नेपाली दूतावास कुवेतले नेपाली मौलिक संस्कृति झल्कने स्टल राखी सहभागिता जनाएको हो ।
नेपालको सामाजिक–सांस्कृतिक विविधता र महत्व झल्काउने प्रचार सामग्री, हिमाल, पहाड लगायत पर्यटकीय महत्वका सामग्रीहरू, पोस्टर, ब्रोस्योर, हस्तकलाका सामग्री, नेपाली लोक बाजा आदिले सजाइएको नेपाली स्टलको उल्लेख्य संख्यामा आगन्तुकहरूले भ्रमण गर्नुका साथै अभिरूची पूर्वक अवलोकन गरी नेपालका सांस्कृतिक विविधता, सम्पदा, पर्यटन र उत्पादनका सामग्रीबारे जिज्ञासाहरू राखेका थिए ।
राजदूत दुर्गाप्रसाद भण्डारी र दूतावासका कर्मचारीहरूद्वारा स्थानीयका जिज्ञासालाई सम्बोधन गर्दै नेपाल भ्रमणका लागि अनुरोध गरिएको दूतावासले जनाएको छ ।
नेपाली स्टलमा राखिएका नेपाली परम्परागत तथा लोकप्रिय खानाका परिकार मःमः, सेलरोटी, फुलौरा, बारा, पकौडा बारेमा आगन्तुकहरूले जानकारी लिनुका साथै रूचि देखाएका थिए । स्थानीय नेपाली कलाकारहरूले नेपाली लोक बाजा सहितको सांस्कृतिक प्रस्तुती एवं नेपाली पहिरनमा सजिएका कलाकारहरूको नेपाली गीत तथा नृत्यलाई उपस्थित दर्शकहरूले प्रशंसा गरेका थिए ।
बसन्त ऋतुको आगमनसँगै मनोरञ्जनात्मक कार्यक्रम सहितको यो विशेष अवसरमा आयोजित प्रवर्द्धनात्मक कार्यक्रममा नेपाली दूतावासको सहभागिताले नेपालको पर्यटन क्षेत्र एवं सामाजिक–सांस्कृतिक वैभवता एवं विविधता लगायत केही हदसम्म नेपाली उत्पादनको स्थानीय बजारमा प्रचार प्रसारमा सहयोग पुग्न गएको अपेक्षा गरिएको छ ।
