काठमाडौं । मंगलबार बाग्लुङको निसिखोलामा भएको जिप दुर्घटनाप्रति राष्ट्रिय जनमोर्चाले दुः प्रकट गरेको छ । अध्यक्ष चित्रबहादुर केसीले बुधबार विज्ञप्ति प्रकाशित गरी घटनाप्रति दुःख प्रकट गर्नुभएको हो । गुल्मी र बाग्लुङ जिल्लाको सिमानामा पर्ने बडीगाड गाउँपालिका–७ भिमगिठे नजिकै भएको दुर्घटनामा परी १४ जनाको निधन हुनुका साथै तीन जना घाइते र एक बेपत्ता भएका छन् ।
अध्यक्ष केसीले विज्ञप्तिमार्फत सो खबरले राजमो अत्यन्तै मर्माहत भएको बताउनुभएको छ । देशका विभिन्न भागमा हुने यस प्रकारका सवारी दुर्घटनाहरु नेपाली सडकको दूरावस्था, पुराना सवारी साधनको प्रयोग र सवारी सञ्चालनमा देखिएको हेलचेक्राइ समेतका कारण रहेको भन्दै सवारी दुर्घटनालाई न्यूनीकरण गर्न आवश्यक पहलका लागि सम्बन्धित क्षेत्रको विशेष ध्यान जान जरुरी रहेको अध्यक्ष केसीको विज्ञप्तिमा उल्लेख छ ।
विज्ञप्तिमा दुर्घटनामा निधन भएकाहरुका परिवारजनका लागि उचित क्षतिपूर्तिका साथै बेपत्ताको खोजी र घाइतेहरुको निःशुल्क स्वास्थ्योपचारका लागि सरकारसँग माग गरिएको छ।
वक्तव्यको पुर्णपाठः
“मिति २०७६ मंसीर १७ गते बिहान गुल्मी जिल्लाको इस्मा गाउँपालिकाबाट बागलुङको निसीखोला गाउ“पालिका वडा नं. १ मा कुल पुजाका लागि जादै गरेको ग. १ ज.५२१९ नं. को जीप बागलुङ जिल्लाको बडिगाड गाउँपालिका ७ भीमगिठेको घोपर्नमा दुर्घटना भई चालक सहित १४ जनाको घटनास्थलमै मृत्यु भएको, एकजना बेपत्ता भएको र दुई जना घाइते भएको खबरले हामीलाई स्तब्ध बनाएको छ ।
यस दुःखद घट्नामा परी मृत्यु हुनेहरुप्रति भावपूर्ण श्रद्धाञ्जली अर्पण गर्दै शोकाकुल परिवारजनप्रति हार्दिक समवेदना व्यक्त गर्दै दुर्घटनामा बेपत्ता हुनेको खोजी र घाइतेहरुको शीघ्र स्वास्थ्यलाभको कामना गर्दछौं । सरकारको सवारी सम्बन्धी फितलो नीति तथा सडकहरुको स्तर उन्नती नभएका कारण दिनै पिच्छे सवारी दुर्घटना हुने गरेकाले सम्बन्धित निकायको यसतर्फ ध्यानाकर्षणको लागि जोडदार माग गर्दछौं ।”
